ज्ञानोदयय् आइटी ल्याब उलेज्या
येँ(नेपालभाषा टाइम्स)÷बागमति प्रदेशया मुख्यमन्त्री शालिकराम जम्मकट्टेलं शिक्षा ख्यःया विकासया निंतिं प्रदेश सरकारपाखें योगदान यायेत थः इच्छुक जूगु खँ धयादीगु दु । प्रदेश सरकारयात शिक्षाया ख्यलय् छुं यायेगु अधिकार बियामतःगु धासें प्रदेशयात नं शिक्षाया विकासया निंतिं अधिकार दयेमाःगु आवश्यक जूगु खँ वय्कलं धयादीगु दु ।
ज्ञानोदय माध्यमिक विद्यालयया आइटी ल्याबया उलेज्यालिसें विद्यार्र्थीया सम्मान व विदाई ज्याझ्वलय् नवासें मुख्यमन्त्री जम्मकट्टेलं देय्या प्रमुख पेशाया रुपय् दयाच्वंगु कृषिया विकासया निंतिं शिक्षाय् हे थ्व विषययात दुथ्याकाः अध्ययन अध्यापन याकेमाःगु आवश्यक दुगु खँय् बः बियादीगु दु । वय्कलं थुकिया निंतिं प्रस्ताव आह्वान यानागु खःसां दुहां धाःसा मवःगु खँय् दुःख प्वंकादिसें ज्ञानोदय स्कुलयात धादिङय् कृषि विद्यालय संचालनया निंतिं इनाप यानादिल ।
विशेष पाहांकथं झायादीम्ह येँ क्षेत्र नं ८या प्रतिनिधिसभा सदस्य विराजभक्त श्रेष्ठं थःगु हे छेँ लिक्क च्वंगु ब्वनेकुथिं याःगु थुकथंया उन्नति व प्रगतिं थः तसकं लय्ताः धासें विद्यार्थीतय्त अनुशासित जीवन हनेगुपाखे नं ध्यान बीत इनाप यानादिल ।
मेम्ह विशेष पाहां येँ महानगरया उपप्रमुख सुनिता डंगोलं विद्यार्थी जीवन चुनौतिपूर्ण जुइ धासें स्कुलय् ब्वनाच्वँतले स्कुल गबलें नं बांलाः धइगु तायेकीमखु, जब स्कुल त्वःता वनी अबले शिक्षक, शिक्षिकाया खँ हाकनं न्यने दुसा जिउ, स्कुल वने दुसा जिउ धइथें जुइ धयादिल । शिक्षाया निंतिं जक ब्वनेगु मखसे थःत यःगु विषय कयाः अध्ययन यायेगु स्वयेमाः धइगु खँय् वय्कलं बः बियादीगु दु ।
ज्याझ्वलय् येँ महानगरपालिका शिक्षा विभागया प्रमुख रामप्रसाद सुवेदी, राष्ट्रिय परीक्षा बोर्डया अध्यक्ष महाश्रम शर्मा, केन्द्रीय शिक्षक संघया सुन्दर पन्त, अखिल नेपाल शिक्षक संघया अध्यक्ष शंकर अधिकारीं थःथःगु नुगःखँ तयादीगु खःसा १३ वडा सदस्य रामबाबु कोइराला, समाजसेवी नापं अभियन्ता सुमन साय्मि, छात्रवृत्तिया दाता यशोधरा पन्त लगायतं भिंतुना न्वचु बियादीगु खः ।
विद्यालय व्यवस्थापन समितिया अध्यक्ष उर्मिला मालीया सभापतित्वय् प्रधानाध्यापक नातीकाजी महर्जनं लसकुस यासें विद्यालयया गतिविधि बारे जानकारी बियादीगु ज्याझ्वलय् विद्यालयया शिक्षक व विद्यार्थीतय्त सम्मान नापं विदाइ नं याःगु खः ।
विद्यालयया शिक्षक शिक्षिकापिंत सम्मान नं याःगु ज्याझ्वलय् वि.सं. ०७६÷०७७ व ०७८ सालय् प्लस टुया परीक्षाय् उत्कृष्ट विद्यार्थीयात छात्रवृत्ति व सम्मानपत्र लःल्हाःगु खःसा ‘ज्ञानोदय हेराल्ड’ नांया स्मारिका नं पितब्वज्या याःगु खः ।
LEAVE YOUR COMMENTS