आः ७० नम्बर जक वःसां लाइसेन्स दइगु

येँ (नेपालभाषा टाइम्स)- बागमति प्रदेश दुने आवंलि सवारी लाइसेन्स कायेत ट्रायल परीक्षाय् ७० अंक जक हःसां पास जुइगु प्रणालीया परीक्षण शुरु याःगु दु । चाबहीया याता–यात व्यवस्था कार्यालयस्थित ट्रायल सेन्टरय् जूगु थ्व परीक्षण श्रम, रोजगार तथा यातायात मन्त्री एकालाल श्रेष्ठ व मुख्यसचिव मुकुन्दप्रसाद निरौलां अवलोकन यानादीगु खः ।

लाइसेन्सया थ्व अंक प्रणाली थनिंनिसें येँया च्यागू लिसें हेटौंडा, चितवन व सिन्धुली यानाः ११ गू कार्यालयय् लागू याइगु जूगु दु । न्हापा ट्रायलय् सामान्य जक त्रुटि जूसां फेल याइगु जूगुलिं चालकतय्सं ध्यबा नकाः लाइसेन्स काये मालीगु जुयाच्वंगु खः । थुगु व्यवस्थां लाइसेन्स कायेत जुइगु झंझट छुं भचा म्हो याइगु खँ धाःगु दु ।

थ्व स्वयां न्ह्यः नं बागमति प्रदेशय् ७० अंक भारया परीक्षा प्रणाली लागू यायेत स्वःगु खःसा ड्राइभिङ टेनिङ सेन्टरया सञ्चालक पिनिगु दबावय् उकियात लागू याये मफयाच्वंगु खः । आः उगु प्रणाली कार्यान्वयन जुइगु जूगु दु ।