विप्लव नेतायात स्याःगु द्वपं

येँ –  राष्ट्रिय मानव अधिकार आयोगं विप्लव नेता कुमार पौडेलया हत्या जूगु खँ धाःगु दु । आयोगं पौडेल भिडन्तय् सीगु छुं कथं नं पुष्टि मजूगु खँ धाःगु दु । आयोगया सोमवाः च्वंगु बैठकं पौडेल दोहोरो भिडन्तय् सीगु छुं कथं नं प्रमाण मदुगु ठहर याःगु खः । आयोगं थ्व घटनाय् प्रत्यक्ष रुपं संलग्न दुपिं प्रहरीं व उगु प्रहरी टोलीया नेतृत्व याःपिं प्रहरी अधिकारीविरुद्ध मुद्दा चले यायेत नं सरकारयात निर्देशन बिउगु क्वःछिउगु दु ।

असारया न्हापांगु वालय् विप्लवया सर्लाही जिल्ला नेता पौडेलयात लालबन्दीया जंगलय् प्रहरीं स्याःगु खः । प्रहरीं पौडेल दोहोरो भिडन्त सीगु धया वयाच्वंगु खः । तर उबलय् हे प्रहरीया थ्व दावी विरुद्ध विरोध सुरु जूगु खः । विप्लव व पौडेलया छेँजःपिंसं पौडेलयात प्रहरीं नियन्त्रणय् कायेधुंकाः स्याःगु द्वपं बिया वयाच्वंगु खः । नेपाली कांग्रेसं संसद तकं अवरुद्ध यानाः थुकिया विरोध याःगु खः ।

उबलय् नेकपाया सांसद जनार्दन शर्मां तकं पौडेलया ल्हाः खुथाय् न्हय्थाय् त्वःधुलाच्वंगु दु धासें प्रहरीं नियन्त्रणय् कयाः स्याःगु खँ धाःगु खः । थ्व लिपा मानवअधिकार आयोगं थ्व सम्बन्धी अनुसन्धान सुरु याःगु खः । आयोगं अनुसन्धानया झ्वलय् प्रहरींयात पोस्टमार्टम रिपोर्ट व प्रहरी प्रतिवेदन बीत धाःगु खःसां प्रहरीं थ्व निगुलिं प्रतिवेदन आयोगय् बुझे मयाःगु खः ।

सम्बन्धित बुखँ

LEAVE YOUR COMMENTS