रेशम चौधरी थौं अस्पतालं हानं जेल वनीगु

‘भारतयात क्यनेत अनसन त्वतकूगु’

येँ -थारु आन्दोलनया न्ह्यलुवाः लिसें राजपाया सांसद रेशम चौधरी थौं अस्पतालं डिस्चार्ज जुयाः हानं जेल झायेत्यंगु दु । टीकापुर घटनाय् थः लगायत आपालं स्थानीय थारुतय्त अन्यायपूर्वक ज्वनाः जेलय् कुनातःगु विरोधय् जेल दुने हे अनसन च्वनेवं विरामी जूम्ह वय्कःयात थनिं लछि व च्यान्हु न्ह्यः अस्पताल भर्ना याःगु खः । अस्पतालय् स्वयम् गृहमन्त्री रामबहादुर थापा बादल वयाः वय्कःयात याकनं हे सांसद पदया शपथ ग्रहण याकेगु जुइ धासें अनसन त्वःतकूगु खः । तर अनसन त्वःतकाः शपथ ग्रहण धाःसा मयाकू ।

सरकारं थःगु अनसन त्वःतकेगु लागिं तःधंगु झुठ खँ ल्हाःगु द्वपं वय्कलं बियादीगु दु । म्हिगः नेपालभाषा टाइम्स लिसे खँ ल्हासें वय्कलं प्रधानमन्त्री केपी ओली भारत भ्रमणय् वनेत्यंगु जूगुलिं अन भारतीय नेतातय्सं थःगु अनसन बारे न्ह्यसः तइ धकाः जक हथासं अनसन त्वःतकेगु ज्या जूगु खँ कनादिल ।

अबले अनसन त्वःतकेत थःत जुस त्वंकः वःम्ह गृहमन्त्री रामबहादुर थापां छितः निन्हु प्यन्हु लिपा हे शपथ ग्रहण याकेगु जुइ धकाः बचं बियाथकूगु खःसां अनसन लिपा वास्ता तकं मयाःगु द्वपं नं चौधरीं बियादिल । ‘सरकार हे थुलि झुठ जुइसा मेपिनिगु छु खँ ल्हायेगु ?’ वय्कलं धयादिल ।
सरकार थम्हं हे कानून पालना मयासे थःपिंत जेलय् कुनातःगु खँ नं वय्कलं कनादिल । नेपाःया कानून कथं सुं नं मनूयात दछि तक जक पुर्पक्षय् तयाः मुद्दा चले याये दइ, तर थःपिंत स्वदँ न्ह्यवंनिसें पुर्पक्षय् तयातःगु खँ वय्कलं कनादिल ।

थम्हं थें हे वारेशनामापाखें उम्मेदवारी दर्ता याःम्ह शेरबहादुर देउवायात शपथ ग्रहण याकल, रेड कर्नर नोटिश जारी यानातःम्ह नवराज सिलवालयात शपथ ग्रहण याकल, तर थःत छम्ह थारुया मचा जूगुलिं शपथ ग्रहण मयाकुसे कुनातःगु खँ कँसें वय्कलं धयादिल, ‘राज्य थ्व ति अप्वः गुलि जातिवादी धायेगु आः ?’

म्हय् नशा छपु कानाच्वंगुलिं अस्पतालय् च्वंच्वनागु खःसां जेलं यक्व हे किचकिच याःगुलिं थौं डिस्चार्ज कयाः जेलय् वनेत्यनागु खँ कँसें वय्कलं आः हानं आन्दोलन न्ह्याकेगुया विकल्प मदु धयादिल । जेल दुने जक मखु आः जेलं पिने च्वंपिंसं नं थ्व मुद्दायात ल्ह्वनाः आन्दोलन यायेमाःगु खँय् वय्कलं बः बियादिल । जेलय् लिहां वनाः आः अनसन धाःसा मच्वनेगु खँ नं वय्कलं कनादिल । थ्व स्वयां न्ह्यः वय्कः जेलय् १८ न्हु अनसन च्वनादीगु खः ।