येँ–केरुङ रेलमार्गया अध्ययन शुरु

येँ (नेपालभाषा टाइम्स)- येँनिसें चीनया केरुङ थ्यनीगु रेल मार्गया विस्तृत अध्ययन–या ज्या न्ह्यःने न्ह्याःगु दु । थुकिया अध्ययन यायेत सोमवाः जक छगू चिनियाँ पुचः नेपाः थ्यंकः वःगु खःसा उगु पुचलं अध्ययनया ज्या शुरु याःगु दु । थ्व विस्तृत अध्ययन जक यायेत हे स्वदँ बीगु खँ दु । चीनं दयेका बीगु धकाः प्रस्तावित यानातःगु थ्व रेल चीनया केरुङं नेपाःया रसुवा– गढी जुयाः येँय् तक थ्यनी ।

वंगु वि.सं. २०७५ सालय् थ्व रेलमार्गया पूर्व सम्भाव्यता अध्ययन जूगु खःसा चिनियाँ राष्ट्रपति सी चिनफिङ वंगु असोजय् नेपाः वयेवं थुकिया विस्तृत अध्ययन यायेगु सहमति जूगु खः । तर दथुइ कोरोना महामारीं यानाः ज्या न्ह्याः वने मफुगु खः । थुकिया सम्भाव्यता अध्ययन जूबलय् रेलमार्ग गनं गन तक यंकेगु धकाः अध्ययन जूगु खः ।

विज्ञतय्सं धाःकथं भौगोलिक कारणं यानाः थ्व रेलमार्गया निर्माण अतिकं जटिल जुइगु खनेदु । तसकं तजाःगु थासं छक्वलं चिजाःगु थासय् कुहां वयेमाःगु जुयाः थुकिया निर्माण दुश्कर जुइगु अनुमान जुयाच्वंगु दु ।

भौगोलिक कारणं यानाः थ्व रेलमार्गया ९९ प्रतिशत ब्व सुरुङ मार्ग जुयाः न्ह्याइगु खँ धाःगु दु । थुकिया केवल १ प्रतिशत जक भूमिया च्वय् जुइ । थ्व रेलमार्ग दयेकल धाःसा नेपाःया यातायात ख्यलय् न्हूगु युग शुरु जुइगु खँ धाःगु दु ।