न्हूगु सरकारया सुुरसार मदुनि

येँ (नेपालभाषा टाइम्स)- मंसिर ४ गते क्वचाःगु निर्वाचनया १७५ हे सिटया ल्याःचाः अन्तिम चरणय् थ्यंगु दु । थ्व धुनेवं आः न्हूगु सरकार गठनया तयारी न्ह्याइगु जुयाच्वंगु दु ।
फुक्क सांसदया नांधलः पिहां वयेवं राष्ट्रपतिपाखें संसद आह्वान यानादी । संसद न जुइधुंकाः राष्ट्रपतिपाखें सरकार गठनया लागिं दलतय्त सःतादी ।

संविधानया धारा ७६ (१) कथं संसदया दकलय् तःधंगु दलयात सरकार गठनया लागिं सःतेमाःगु खःसां चुनावया लिच्वः कथं संसदय् छुं हे दलयात स्पष्ट बहुमत मवःगु जूगुलिं आः राष्ट्रपतिं धारा ७६ (२) कथं निगू वा व स्वयां अप्वः दलया समर्थन कयाः सरकार गठन यायेत आह्वान याइगु खनेदु ।

न्हूगु संसदया आह्वान पुसं हे जुइगु खनेदु । तर संसद आह्वान जुइगु न्ह्यःने हे थ्यनेधुंकाः तक नं सत्ता गठबन्धनपाखें सरकार गठनया खास तयारी धाःसा यानाच्वंगु मदुनि । नेपाली कांग्रेस व माओवादी केन्द्र निगू मध्ये सुयागु नेतृत्वय् सरकार गठन यायेगु धकाः क्वःछी मफयाः सरकार दयेकेगु ज्या न्ह्याः मवनाच्वंगु खँ सूत्रं धाःगु दु ।

सूत्रतय्सं धाः कथं सरकार गठनया लागिं सदनया निगूगु तःधंगु दल नेकपा (एमालें) नं कुतः यानाच्वंगु दनि । न्हूगु सदन च्वनीगु इलय् हे सत्ताय् वने फत धाःसा राष्ट्रपति, उपराष्ट्रपति, सभामुख, उपसभामुख व संसदया थीथी समितिया सभापति पद तक नं ‘शेयर’ याये खनीगु जूगुलिं थःगु समेत सहभागिताय् सरकार गठन यायेगु कुतः एमालें यानाच्वंगु खँ सीदुगु दु । यदि एमालेया साथ दत धाःसा माओवादी केन्द्रया अध्यक्ष पुष्पकमल दाहालया नेतृत्वय् सरकार गठन याये फइगु जूगुलिं दाहालं सत्ता गठबन्धन दुने बार्गेनिङ यानाच्वंगु खँ धाःगु दु ।

न्हूगु संसद आह्वान जुइवं हे वर्तमान राष्ट्रपति विद्यादेवी भण्डारीया नं कार्यकाल फुइगु जूगुलिं संसदं न्हूम्ह राष्ट्रपति नं ल्ययेगु ज्या न्ह्याकी । न्हूम्ह राष्ट्रपति ल्ययेगु ज्या संघ व प्रदेश सभाया सांसदतय्सं याइ । अन बहुमत कायेफुम्ह उम्मेदवार राष्ट्रपति निर्वाचित जुइ ।

सत्ता गठबन्धन दुने सु प्रधानमन्त्री जुइ धयागु खँ राष्ट्रपति, उपराष्ट्रपति, सभामुख, उपसभामुख पद समेत सुनां सुनां कायेगु धकाः प्याकेज दयेकाः सहमति यायेत कुतः जुयाच्वंगु खँ सूत्रं धाःगु दु ।

सम्बन्धित बुखँ

LEAVE YOUR COMMENTS