गणतन्त्र विरुद्ध सामाजिक सञ्जाल प्रयोग

येँ (नेपालभाषा टाइम्स)÷नेकपा माओवादी केन्द्रया अध्यक्ष पुष्पकमल दाहालं संविधान उल्टे यायेगु कुतः जुयाच्वंगु खँ धयादीगु दु । प्रेस सेन्टर नेपालं चितवनय् म्हिगः याःगु भिन्तुना कालबिल ज्याझ्वलय् न्ववायेगु झ्वलय् अध्यक्ष दाहालं उगु खँ धयादीगु खः ।

गणतन्त्रयात कमजोर यायेगु षडयन्त्र जुयाच्वंगु धासें वय्कलं धयादिल, ‘आः छगू तत्व थ्व संविधानयात गुकथं उल्टे यायेगु, संघीय लोकतान्त्रिक गणतन्त्रयात गुकथं कमजोर यायेगु, पार्टीयात गुकथं बदनाम यायेगु, हिउपालय् योगदान याःपिं नेतातय्त गुकथं बदनाम यायेगु धकाः वनाच्वंगु दु ।’

वय्कलं प्रत्येक क्रान्ति लिपा प्रतिक्रान्तिं छ्यं ल्ह्वनीगु खतरा दु धासें तःधंगु क्रान्ति व हिउपाःयात उल्टे यायेगु कुतः व षडयन्त्र जुयाच्वनीगु खँ नं धयादीगु दु । उकथं वय्कलं गबलें गबलें षडयन्त्र न्हापा सोचे यानागु स्वयां गुलिखे गुणा तःधं जुया वइगु जूगुलिं खतरापाखे नं इंगित यानादिल । हिउपाःया विरोध यायेत थौंकन्हय् सामाजिक सञ्जालयात माध्यम दयेकाच्वंगु धासें सामाजिक सञ्जाल छ्यलाः प्रतिगमनकारीतय्सं जनमत सिर्जना यायेफइगु खँ नं वय्कलं धयादिल ।

उकथं हे अध्यक्ष दाहालं थःगु नितिं प्रधानमन्त्रीया पद प्राथमिकता विषय मजूगु खँ धयादीगु दु । २०७४ सालया निर्वाचन लिपा हे थःत न्यादँ तक प्रधानमन्त्री जुइत प्रस्ताव वःगु धासें वय्कलं धयादिल, ‘आः वइगु छुं दँ प्रधानमन्त्रीया रेसय् मखु, लोकतन्त्र, राष्ट्र व संविधानया रक्षा जिगु न्हापांगु प्राथमिकता जुइ ।’