थुगुसी नं इलय् सफू मथ्यनीगु

येँ – देय्न्यंकंया सरकारी स्कूलय् आखः ब्वने माःगु पाठ्यसफू इलय् थ्यंकेगु योजना थुगुसी नं सफल मजुइगु जूगु दु ।
थुगुसी सरकारी सफू छापे यायेगु व छापे यानाः देय्न्यंकं वितरण यायेगु ज्याया समेत जिम्मा कयातःगु जनक शिक्षा सामग्री केन्द्रं थुगुसी नं देय्न्यंकं इलय् हे सफू थ्यंके मफइगु खँ धायेधुंकूगु दु ।

थुकी मध्ये ८ व १० तगिंया पाठ्यसफू येँया हे स्कूलय् तकं उपलब्ध मजूनिगु कारणं पिने जिल्लाय् दइ धकाः ला आशा यायेगु हे बेकार जुइगु खँ धाःगु दु । फुक्कं स्कूलय् यानाः १ करोड ८० लाख पाः सफू छापे यायेमाःगु खःसा आः तकया दुने १ करोड ५० लाख पाः सफू जक छापे याये सिधयाच्वंगु दु । बाँकी सफू छापे यायेत अझ हे ई काइगु खनेदु । जब कि आः वइगु वैशाख १ गते निसें सरकारी स्कूल सञ्चालन हे जुइगु जुयाच्वंगु दु ।

जनक शिक्षां धाःसा वैशाख १ गतेनिसें सरकारं भर्ना अभियान शुरु यायेत्यंगु जूगुलिं थ्व अभियानया नापनापं हे पाठ्यसफू नं वितरण याना यंकेगु खँ धाःगु दु । थगुने देय्न्यंकंया सरकारी स्कूलय् कक्षा सञ्चालन जूगु खुला लिपा तिनि सफू थ्यंगु खः । थुकिं यानाः आखः ब्वनीपिं विद्यार्थीतय्त तःधंगु मर्का जूगु खः । थुगुसी धाःसा खुला थ्यंक ढिला मजुइगु अनुमान याःगु दु ।