सहकारीया बचत जोखिम म्हो यायेत अनुगमन आवश्यक

येँ(नेपालभाषा टाइम्स)- येँ महानगरपालिकाया उपप्रमुख सुनिता डंगोलं सहकारी समिति गठन लिपा सहकारीया अनुगमनयात तीव्रता बीगु खँ धयादीगु दु । वंगु बुधवाः सहकारी विभागया ज्या व योजनाया विषयय् सम्बन्धित अधिकारीतलिसे सहलह यायेगु झ्वलय् वय्कलं कार्यपालिका अन्तर्गत सहकारी समिति गठन यायेधुंकाः अनुगमनयात तीव्रता बीगु खँ धयादीगु खः ।

उपप्रमुख डंगोलं येँ महानगर क्षेत्रया सहकारी संस्थाय् सर्वसाधारणं बचत यानातःगु निक्षेप जोखिमय् लानाच्वंगु धइगु उजुरी वयाच्वंगु धासें अज्याःगु बचत जुयाच्वंगु ध्यबाया जोखिम म्हो यायेत सहकारी संस्थातय् नियमित रुपं अनुगमन यायेमाःगु खँय् नं बः बियादीगु दु ।

महानगर अन्तर्गतया सहकारी विभागं थौंकन्हय् ११८ गू सहकारीया उजुरीयात सुनुवाइ यानाच्वनागु नं बैठकय् जानकारी बिउगु खः । सुनुवाई जुयाच्वंगु मध्ये ७१ गू उजुरी विभाग थम्हं हे स्वया च्वनागु व ल्यं दुगु ४७ गूयात धाःसा कारवाहीया निंतिं प्रहरीइ छ्वयागु खँ धाःगु दु ।

विभाग थम्हं स्वयाच्वंगु उजुरीइ बचत लित कायेत जुयाच्वंगु समस्या, ब्याज मिलान, लिलाम व्यवस्थापन, अध्यक्षया मनोमानी कारोबार, स्टेटमेन्टय् कम ध्यबा क्यनातःगु, साधारण सभा मच्वंगु व मसःतूगु, संचालक समिति व लेखा समितिया विवाद ऋण असुली लगायतया विषय खः।

विभागयाकथं येँ महानगर दुने जक थौंकन्हय् १९५५ गू सहकारी संस्थात संचालन जुयाच्वंगु दुसा उकीमध्ये १६२८ गू बचत तथा ऋण सहकारी, २६४ गू बहुउद्देश्यीय सहकारी, १५ गू कृषि सहकारी, १३ गू उपभोक्ता स्वंगू सीपमूलक, निगू शिक्षामूलक, छगू संचार, स्वंगू श्रमिक व पर्यटन, साझा व च्याया छगूछगू यानाः अन्य न्यागू सहकारी दु ।

संचालनय् दुगु कुल सहकारीमध्ये नं चालु आर्थिक दँय् १८५ गू अद्यावधिक जूगु, निगू संकटग्रस्त अवस्थाय् दुुगु व क्षेत्र विस्तार यानाः कार्यस्थल स्थानान्तरण याःगु निगू सहकारी दु ।

विभागं न्यादँ न्ह्यःनिसें नियमित साधारण सभा मजूगु, अद्यावधिक मजूगु ५ निसें १० गू करोडया प्राथमिक पूँजी दुगु व समुदायय आधारित जुयाः संचालन जुयाच्वंगु सहकारीयात ‘क’ वर्र्ग, नियमित साधारण सभा मजूगु, जरिवाना मपूगु, बचत लित कायेत उजुरी लाःगु व शंकास्पद खने दुगु यात ‘ख’ वर्ग व प्रहरीइ उजुरी लाःगु, अदालतय् मुद्दा लानाच्वंगु, पदाधिकारी वा संचालक बिसिउँ वंगु व जोखिमय् लाःगु सहकारीयात ‘ग’ वर्गय् तयातःगु दु ।
अथे हे पदाधिकारी फरार, विवाद, ऋण प्रवाह, असुली, भुक्तानी, वचत फिर्ता, सम्पत्ति व्यवस्थापन थेंज्याःगु संकटय् लाःगुयात ‘घ’ वर्गय् तयातःगु दु ।

सम्बन्धित बुखँ

LEAVE YOUR COMMENTS