न्हूदँ समारोह समितिं प्रा. शाक्ययात हनीगु

येँ(नेपालभाषा टाइम्स)/ नेपाल संवत् न्हूदँ राष्ट्रिय समारोह समितिं च्वमिलिसें शिक्षाविद् बौद्ध विद्वान प्रा. सुवर्ण शाक्ययात छगू ज्याझ्वःया दथुइ हनीगु जूगु दु । न्हूदँ समारोह समितिं थीथी खलः, पुचः व संघसंस्थाया मंकाः ग्वसालय् समितिया न्हापांम्ह नायः प्रा. शाक्ययात हनेत्यंगु खः ।
दकलय् न्हापां न्हूदँ हनेगु निंतिं जनस्तरं नीस्वंगु न्हूदँ समारोह समितिया वय्‌कः न्हापांम्ह नायः जुयादी । प्रा. शाक्ययात थ्व हे वइगु यंलागा अस्तमि (भाद्र २९ गते) आइतवाः नेपाः ब्यांक्वेटय् छगू तःजिगु ज्याझ्वःया दथुइ हनेत्यंगु खः । चचा प्याखंयात पित हयेगुलिइ तःधंगु भूमिका म्हितादीम्ह प्रा. शाक्यं नेपालभाषा साहित्यया श्रीवृद्धिया निंतिं छुं दँ न्ह्यःतक ओलम्पस क्लब ओमबहाःया ग्वसालय् जुइगु न्हूदँया भिंतुना कालबिल व तुच्चा ज्याझ्वलय् तःदँतक मदिक्क थीथी विषयय् सफू पिथना वयाच्वनादीगु खः ।
दरवार हाईस्कुलाय पुलांम्ह प्रधानाध्यापक तकं जुयादीम्ह प्रा. शाक्य बुद्ध जयन्ती समारोह समितिया सल्लाहकार, ज्ञानमाला भजन राष्ट्रिय समिति, पं.निष्ठानन्द वज्राचार्य स्मृति गुथि थेंज्याःगु संघसंस्थाय् नं उतिकं सक्रिय जुयाः योगदान बियादीगु दु । अथे हे वय्‌कलं बौद्ध भजनलिसें बुद्धया शिक्षा, ज्ञान व उपदेश सम्बन्धी आपालं म्येँ नं च्वयादीगु दुसा थीथी बौद्ध पत्रपत्रिकाया नं सम्पादन यानादीगु दु । बौद्ध धर्मया जागरणय् न्ह्यलुवा जुयाच्वनादीम्ह वय्‌कःयात प्राज्ञिक, बौद्धिक, धार्मिक, भाषिक, सांस्कृतिक, सामाजिक, शैक्षिक व साहित्य ख्यःया छम्ह विशिष्ट व्यक्तित्वकथं कायेगु याः ।