खर्च विवरण मबिउपिं चीकीगु

येँ (नेपालभाषा टाइम्स)- वंगु स्थानीय चुनावय् चुनाव खर्च बुझे मयाःगुपिं समानुपातिक उम्मेदवारतय् नां चीकेगु लागिं निर्वाचन आयोगं प्रक्रिया शुरु यायेत्यंगु दु ।

स्थानीय चुनावय् उम्मेदवार जूपिं तर मत्याःपिं ४३९ म्ह मनूत थीथी पार्टीतय् समानुपातिक उम्मेदवारतय् बन्द धलखय् नां लानाच्वंगु दु । तर निर्वाचन आयोगं थुमिसं स्थानीय चुनावया खर्च विवरण मयाःगुलिं जरिवाना सहित कारवाही यायेगु धकाः धयातःगु दु । उमित जरिवाना पू वयेगु लागिं म्हीग शनिवाः तकया ई बियातःगु खः । यदि जरिवाना पुले चाहे जूसा शनिवाः तक नं जिल्ला निर्वाचन आयोगया ज्याकू चायेकेगु व्यवस्था याःगु खः । तर शनिवाः तकया दुने ग्वःम्ह मनूतय्सं जरिवाना पूवल धइगु अन्तिम ल्याःचाः धाःसा निर्वाचन आयोगं काःगु मदुनि ।

निर्वाचन आयोगया सहप्रवक्ता गुरुप्रसाद वाग्लेया कथं म्हीग तक १२८ म्ह उम्मेदवारतय्सं जरिवाना पू वयेधुंकूगु दु । मेपिं नं उम्मेदवारतय्सं जरिवाना पूवःगु दु । तर अन्तिम धलः धाःसा संकलन जुयाच्वंगु दु ।

स्थानीय चुनावय् उम्मेदवार जुयाः नं खर्च विवरण बुझे मयाःपिंत निर्वाचन आयोगं ७ लाख ५० हजार तकांनिसें १ लाख ५० हजार तका तक बं कायेगु धकाः कारवाही यानातःगु दु । यदि थ्व ध्यबा मपुल धाःसा उपिं खुदँ तक छुं नं चुनावय् उम्मेदवार जुइ मदइगु व्यवस्था कानुनय् यानातःगु दु ।

वंगु स्थानीय चुनावय् उम्मेदवार जूपिं मध्ये चुनाव खर्च विवरण बुझे मयाः धकाः आयोगं १ लाख २३ हजार ६२४ म्हेसित जरिवाना समेत कारवाही यायेगु धयातःगु दु ।