वा वयेवं थिमि आतंकित जुइ

ख्वप- ‘सर्गः खिउँया वयेवं मन ढक्क जुइ, गबले वा वइ, अले नुगलय् त्रासं बाय् काइ’, मध्यपुर थिमि नगरपालिकाया राधेराधेया बसुन्धरा थापां धयादी । थापा जक मखु थुगु क्षेत्रया आपालं जनता थौंकन्हय् वा वयेवं खुसिबाः वइगु जकं खःला धकाः त्रसित जुइगु जुयाच्वंगु दु ।

मध्यपुर थिमि नगरपालिका अन्तर्गत राधेराधे, कमेरोटार क्वय्या क्षेत्र, शङ्खधरचोक व निकोसेरा, ख्वपया सल्लाघारी, हनुमानघाट, बाराही व सूर्यविनायक नपाया कटुञ्जे क्वय्, दधिकोट, बालकोटया स्थानीय बासिन्दायात थज्याःगु त्रास जुयाच्वंगु दु । न्हापा न्हापा खुसिबाः वयाः बस्ती दुने लः दुहां वःसां थुगुसी थें नोक्सान मजू । थुगुसी हनुमन्ते खुसिं ताण्डव हे क्यनाः बस्तीइ दुहां वःगुलिं ग्यानाच्वने माःगु खँ स्थानीय रामप्रसाद प्रजापतिं कनादी । थुगु दँय् वंगु असार २७ व २८ गते खुसि वस्तीइ दुहां वयाः करोडौं तकाया नोक्सान जुइधुंकुगु दु ।

२०२१ सालया नापी कथं हनुमन्ते खुसि बाः वनाच्वंगु मदु । खुसि थःगु धार हिलाः वनाच्वंगु खःसा आः छेँ दनेगु ज्या जूगुलिं खुसि वस्ती दुने दुहां वयाच्वंगु खः । खुसिया जग्गा व्यक्तिया नामय् हयाः छेँ दयेकेगु ज्या जूगुलिं भचा तसकं वा वल धाःसा वस्ती डुबानय् लानाच्वंगु खँ स्थानीय वासिन्दां धाःगु दु ।

बालकोटय् सुचिका पसः तया वयाच्वंम्ह लक्ष्मीबहादुर श्रेष्ठं कनादी कथं खुसिबाः वयाः मनूत छेँनं पिहां तकं वने मफुगु व क्वय्या तल्लाय् च्वनीपिनिगु ला विजोग हे जुयाच्वंगु दु ।

मध्यपुर थिमि नपाया मेयर मदनसुन्दर श्रेष्ठं हनुमन्ते खुसि तब्याकेगु ज्या न्ह्याके धुनागु खँ कनादीगु दु । ७९ करोड तका खर्च यानाः हनुमन्ते करिडोर दयेकेगु ज्या न्ह्याकेधुंकूगु दु । (रासस)

सम्बन्धित बुखँ

LEAVE YOUR COMMENTS