चले जुइ ला नेपाःया जहाज ?

भारतं बीगु जलमार्गया सम्भावना बारे विज्ञतय् आशंका

येँ – भारतय् प्रधानमन्त्री केपी ओलीं जलमार्ग जुयाः समुद्र तक नेपाःया जहाज चले यायेगु धकाः याना वःगु सहमति वास्तवय् लागू याये फइगु खः ला धइगु खँय् तःधंगु वहस शुरु जूगु दु ।भारतीय प्रधानमन्त्री नरेन्द्र मोदीं नं ‘सगरमाथांनिसें समुद्र तक’ स्वापू स्वाइगु खँयात विशेष प्राथमिकता बियाः न्ववानादीगु खःसां नेपालय् धाःसा जलमार्ग आः तुरुन्त छुं हे हालतय् सम्भव मदइगु खँ धयाहःगु दु ।नेपाःया थीथी ततःधंगु खुसि जुयाः भारतया गंगा खुसिइ दुहां वनीगु मू खुसि जुयाच्वंगु कोशीइ दयेकातःगु कोशी बाँधं हे पानी जहाजया लँ पनीगु जूगुलिं उगु बाँध छु यायेगु धइगु मू न्ह्यसः विज्ञतय्सं तया हःगु दु ।

यदि कोशी बाँधयात छले यानाः जहाज चले यायेगु खःसा खुसिया धाः हे मेथाय् स्वके मालीगु जूगुलिं थ्व ज्या झन् कठिन जुइगु खँ धयाहःगु दु ।अथे हे नेपाःया तःधंगु खुसि छीगु लागिं थीथी थासय् ततःधंगु ताँ दयेका तयेधुंकूगुलिं अज्याःगु ताँतय्सं नं जहाजयात पनीगु जूगुलिं थ्व फुक्क ताँ स्यंकाः उकियात जहाज वयेवं खुले जुइगु व लिपा थः हे बन्द जुइगु–भारतया कोलकाताय् च्वंगु हावडा ब्रिज थें) कथं दयेकेमाःगु आवश्यक जुइ । थाय्थासय् थज्याःगु ताँ दयेकेगु लगानीया ल्याखं तसकं थाकुइ ।

अथे हे नेपाःया खुसिइ झिंनिलां हे समान परिमाणय् लः मदइगु जूगुलिं लःया सन्तुलन मिले यायेत थाय्थासय् बाँध व ताःहाकः तटबन्ध समेत दयेकेमाःगु जुइ । जहाज जक चले यायेत बाँध व तटबन्ध दयेकेगु हैसियत आः थथें नेपाःयाके मदुगु खँ नं धयाहःगु दु । उकिं नेपाःया खुसि जुयाः भारत तक जहाज चले यायेगु ज्या असम्भव थ्यंक मखुसां थ्व तसकं थिके जुइगु खँ विज्ञतय्सं धाःगु दु ।

मेगु वालंनिसें जलमार्गया अध्ययन

भारतलिसे नेपाःया नं जलमार्ग बारे चर्चा जुइवं नेपालं आः मेगु वालंनिसें हे जलमार्गया सम्भाव्यता अध्ययन शुरु यायेगु खँ धाःगु दु । यातायात मन्त्री रघुवीर महासेठं आः मेगु वालंनिसें हे मन्त्रालयपाखें नेपाःया जहाज चले यायेगु बारे अध्ययन शुरु यायेगु खँ कनादीगु दु । म्हिगः छगू ज्याझ्वलय् न्ववासें वय्कलं जलमार्ग बारे सम्भाव्यता अध्ययन शुरु यायेगु खँ कनादीगु खः । प्रधानमन्त्री केपी ओलीं समुद्रय् नेपाःया ध्वाँय् दुगु जहाज ब्वयेकेगु धकाः यानादीगु इच्छा पूवंकां त्वःतेगु जुइ धकाः नं कनादिल । लिसें वय्कलं रेलमार्गया बारे नं सम्भाव्यता अध्ययन यानाः दछिया दुने पूवंकेगु खँ कनादिल ।