वर्गीकरणया निंतिं ८६४ आवेदन
येँ – प्रेस काउन्सिल नेपालय् आर्थिक दँ ०७४÷७५ या निंतिं पत्रपत्रिका वर्गीकरणया निंतिं मुक्कं ८६४ गू आवेदन दुहां वःगु दु । काउन्सिलया तरण सम्परीक्षण समितियाकथं थुगु दँय् वर्गीकरणया निंतिं दकलय् अप्वः वाःपौपाखें आवेदन दुहां वःगु दु । काउन्सिलं बिउगु जानकारीकथं वर्गीकरणया निंतिं १७४ गू न्हिपौ, स्वंगू अर्ध साप्ताहिक, ११ गू बाःछिपौ, ८२ गू लय्पौ, प्यंगू चौमासिक, खुगू त्रैमासिक दुहां वःगु दु ।
अथे हे साहित्यिक भाषाभाषी सम्बन्धी ५७ गू आवेदन नापं मुक्कं ८६४ गू आवेदन दुहां वःगु दु ।थुकथं हे प्रादेशिक ल्याखं दकलय् अप्वः प्रदेश नं. ३ पाखें ३८४ गू आवेदन दुहां वःगु दुसा दकलय् म्हो कर्णाली प्रदेशपाखें २३ गू जक आवेदन दुहां वःगु काउन्सिलं न्ह्यथंगु दु ।
प्रदेश नं. १ पाखें १११, प्रदेश नं. २ पाखें १७७, गण्डकी प्रदेशपाखें ६२, प्रदेश नं. ५ पाखें ६३ व सुदूरपश्चिम प्रदेशपाखें ४४ गू आवेदन दुहां वःगु काउन्सिलं जानकारी बिउगु दु । थ्व बाहेकं प्रक्रिया पूमवंगु व लिबाक दुहां वःगु ३७ गू पत्रपत्रिकाया सम्बन्धय् काउन्सिलया बोर्ड बैठकं निर्णय यायेधुंकाः जक जानकारी बीगु जूगु दु । वंगु आर्थिक दँय् ९५३ गू पत्रपत्रिकां वर्गीकरणया निंतिं आवेदन बिउगु नं काउन्सिलं जानकारी बिउगु दु ।
LEAVE YOUR COMMENTS