ने. सं. ११४४ कौलाथ्व पारू - नःलास्वनेगु

बुद्धमूर्ति स्यंकूपिंत कारवाहीया माग

येँ- धर्मोदय सभां लुम्बिनीया तिलोत्तमा नगरपालिकाया सिद्धार्थ राजमार्गय् तयातःगु बुद्धमूर्ति तछ्याःपिंत कडा कारवाही यायेत माग याःगु दु । सभां छगू वक्तव्य पितबिसें बुद्ध जन्मभूमि क्षेत्रय् हे थथे बुद्ध मूर्ति तछ्यानाबिउगु तसकं आपत्तीजनक व घृणित ज्या खः धासें थज्याःगु ज्या जुलं नं स्थानीय निकाय, सुरक्षा प्रशासन व प्रदेश सरकार थेंज्याःगु निकाय मौन च्वनाच्वंगुलिं थःपिं तसकं मर्माहत जूगु खँ धाःगु दु ।

छुं न्हि न्ह्यव सिद्धार्थ राजमार्गया ड्राइभर टोल खण्डय् लाःगु सतक सिथय् तयातःगु बुद्ध मूर्तियात तछ्यानाबिउगु खः । निदँ न्ह्यव नं तिलोत्तमा नगरक्षेत्रय् हे थथे न्यागू बुद्धमूर्ति तछ्यानाबिउगु खः

सभाया महासचिव सागरमान वज्राचार्य बुद्धमूर्ति तोडफोड याःपिंत कारवाही यायेत माग यासें थःपिं गृह मन्त्रालय वनेत्यनागु खँ धयादीगु दु । नेपालभाषा टाइम्सलिसे खँ ल्हासें वय्कलं न्हापा नं थथे तोडफोड याःपिंत कारवाही मजूगुलिं हे हाकनं हाकनं थथे बुद्धमूर्ति स्यंकेगु ज्या जुयाच्वंगु खँ धयादीगु दु ।

‘निदँ न्ह्यः लुम्बिनीइ हे न्यागू बुद्ध मूर्ति तछ्यानाबिउबलय् नं जिपिं गृह मन्त्रालय थ्यंक वनाः थथे ज्या याःपिंत कारवाही यायेमाल धाः वनागु खः । उबलय् गृहमन्त्रीं कारवाही यायेगु आश्वासन ला बिल, तर कारवाही मजूबलय् थथे हाकनं हाकनं बुद्धमूर्ति तछ्यायेगु ज्या जुयाच्वंगु दु’, वय्कलं धयादीगु दु ।

वय्कलं थ्वपालय् बुद्ध मूर्ति तछ्याःपिंत कारवाही यायेत माग यासें संस्कृति तथा पर्यटन मन्त्रालय वनेधुनागु लिसें थीथी सांसदपिंत संसदय् ध्यानाकर्षण याकेत इनाप यायेधुनागु जानकारी नं बियादिसें याकनं हे थःपिं गृह मन्त्रालयय् नं वनेत्यनागु खँ कनादीगु दु ।