स्वनिगःया खुसिइ अप्वः लः बाः वयेकेगु बारे सहलह

येँ (नेपालभाषा टाइम्स)- उपप्रधान लिसें सहरी विकास मन्त्री प्रकाशमान सिंहं स्वनिगःया बागमती, विष्णुमती लगायतया खुसिइ लःया प्रवाह अप्वयेकेत विज्ञतलिसे सहलह यानादीगु दु ।
म्हिगः मन्त्रालयय् विज्ञतलिसे सहलह यासें वय्कलं बागमती, विष्णुमती लगायत खुसिइ सफा लः बाः वयेकेत अल्पकालीन, मध्यकालीन व दीर्घकालीन योजनाया बारे राय कयादीगु खः । स्वनिगःया खुसियात पुनर्जीवन बीगु, स्वनिगःयात स्वच्छ व सफा याना तयेगु, फोहोरमैला व्यवस्थापन यायेगु विषययात कयाः मन्त्री सिंहं सहलह यानादीगु खः ।

मन्त्री सिंहं खुसिइ लः बाः मवनाः दुर्गन्ध न्यनाच्वंगु व लः बाः वंकेगु खःसा नवःगु छुं म्हो जुइ ला धकाः छुं थासय् बोरिङ यानाः जूसां खुसिइ लःया प्रवाह अप्वकेगु खँ थम्हं सोचे यानाच्वनागु धासें
विज्ञतय्सं बांलाःगु सुझाव बिउगु व विज्ञतलिसे हानं च्वनाः मेगु छु छु यायेफइ धकाः सहलह यायेगु खँ नं धयादीगु दु ।
मन्त्रालयया सचिव मणिराम गेलालं तत्काल लःया प्रवाह अप्वयेकेत सुन्दरीजलंनिसे टेकुतक थीथी थासय् बोरिङ यानाः लः बाः वंकेगु, शंखमूलंनिसे कुपन्डोल तक लः मुंकाः ‘बोटिङ’ सञ्चालन यायेगु विषयय् विज्ञतय्गु राय कायेगु ज्या जूगु खँ कनादीगु दु ।

सहलहया झ्वलय् विज्ञतय्सं सुख्खा यामय् स्वनिगःया खुसिइ लःया प्रवाह अप्वयेकेत प्राविधिक सम्भाव्यताया बारे सुझाव बिउगु खः । विज्ञतय्सं बोरिङ यानाः लःया प्रवाह अप्वयेकेगु विकल्प अल्पकालीन रुपय् छ्यले फइगु सुझाव बिउगु दुसा छुं विज्ञतय्सं बोरिङ यायेबलय् उकिं लाकीगु लिच्वःयात कयाः मूल्यांकन यायेमाःगु सुझाव नं बिउगु खः ।