ने. सं. ११४४ कौलाथ्व एकादशी - चालं

बही द्यः स्वक्वःगु उदाय मुनाया आकर्षण

थनया प्रदर्शनी मार्गय् च्वंगु भृकुटीमण्डपय् आपालं वस्तुया ब्वज्यात जुयाच्वंगु दइ, नेवाः समुदायया संस्कृति पिब्वइगु भराय्धिकःगु बुद्धमूर्तिं धाःसा आपालं स्वकुमिपिं सकसिगुं ध्यान साला काःगु दु ।वंगु शनिवाः भृकुटीमण्डपय् जूगु स्वक्वःगु उदाय मुनाया झ्वलय् ब्वज्याय् तयातःगु मनू स्वयां नं तःधिकःम्ह झण्डै ९ फिट तःधिकःम्ह धलौटया बुद्धमूर्तिइ स्वकुमिपिनिगु आकर्षण खने दुगु खः ।

ब्वज्याय् छम्ह जक बुद्ध मूर्ति तयातःगु धाःसा मखु, अज्याःगु बुद्ध मूर्ति जक च्याम्ह दुगु खः । थ्व मूर्ति नेवाः बौद्ध समुदायं पंजरांया दिनय् विशेष ब्वज्या यायेगु प्रचलन दु । पंजरांया दिनय् ब्वज्या याइगु प्राचीन बुद्धमूर्तिया पुजा यायेगु व मूर्ति न्ह्यःने च्वनाः सेल्फी काइपिं गाक्कं हे दुगु खः ।

शाक्यमुनि बुद्धया जन्म जुइ स्वयां न्ह्यःया बुद्ध व दिपंकर तथागत, दिपंकर बुद्ध, दिपंकर तथागत सम्यक भगवान, पंजरां द्यःया ततःधिकःपिं च्याम्ह बुद्धमूर्ति ब्वज्याय् तयातःगु खः । थुकियात बही द्यः नं धायेगु याः । उदाय मुनाया मेगु आकर्षण धइगु उदाय जातिया थीथी पुजा पर्वय् बौद्ध व हिन्दू परम्पराकथं क्यना वयाच्वंगु देवी प्याखं खः ।

लोप जुया वनेत्यंगु असंया कुम्हो प्याखं नं स्वकुमिपिनिगु आकर्षणया केन्द्र जुयाबिउगु दु । थ्व प्याखनय् वज्रयान बौद्ध धर्मया शक्तिपाखें तलेजु भवानीयात रक्षा याइगु दृश्य क्यनातःगु दइ ।

येँया न्यत त्वालय् च्वंगु न्यत तुलाधर समितिं दँय्दसं ब्वज्या याइगु न्यतमरु अजिमाया प्याखं क्यंगु खः । नेवाः परम्पराकथं दँय्दसं पाहांचः¥हेया दिंकुन्हु उदाय जातिं थ्व प्याखं क्यनीगु परम्परा दु । थुकी गंप्याखं धकाः थीथी देवदेवीया प्याखं नं क्यनी । अथे हे लोप जुया वनेत्यंगु असंया कुम्हो प्याखं नं स्वकुमिपिनिगु आकर्षणया केन्द्र जुयाबिउगु दु ।

थ्व प्याखनय् वज्रयान बौद्ध धर्मया शक्तिपाखें तलेजु भवानीयात रक्षा याइगु दृश्य क्यनातःगु दइ । रत्नकेतु बोधिसत्वया रुपय् दइगु कुम्हो प्याखं हुलीम्ह मचां तलेजु भवानीयात आकाश मार्गं वये फइगु भयपाखें रक्षा याइ । अथे हे पातालं वइगु भयपाखें रक्षा यायेगु ज्या चन्द्रकेतु बोधिसत्वं याइ ।

जुजु जयप्रकाश मल्लया शासनकालय् अर्थात करिब ३०० दँ न्ह्यःनिसें थ्व प्याखं क्यना वयाच्वंगु खःसां नं ३२ दँ न्ह्यःनिसें थ्व प्याखं बन्द अवस्थाय् लानाच्वंगु ग्वसाः खलकं जानकारी बिउगु दु । थ्व प्याखं उगु इलय् बौद्ध व हिन्दूतय् दथुइ विवाद जुइवं उगु विवाद समाधान यायेत धासें कुम्हो प्याखं क्यंगु समाजसेवी ज्ञानेन्द्र तुलाधरया धापू दु ।

समाजसेवी लिसें उदाय समाजया प्रचार विभाग प्रमुख सुगतरत्न सिन्दुराकारं उदाय जातिया परम्परागत पेशा लोप जुया वनाच्वंगु कनादिल । ताम्राकार, कंसाकार, तुलाधर, स्थापित, बनिया, सेलालिक, शिलाकार, सिख्राकार, सिन्दुराकार यानाः गुंगू जातिइ विभाजित जुयाच्वंगु उदाय समुदायं नेपालय् तान्त्रिक पुजाया निंतिं देवीदेवताया निंतिं माःगु क्वखंगा, धकिंगा, ग्वय्का आदि दयेकेगु पेशा दुगु खःसां नं थौंकन्हय् थुपिं पेशाय् ज्या याइपिं मनूतय् अभाव जुइधुंकूगु वय्कःया धापू दु ।

थीथी सेवा, व्यवसाय, सीप व नेवाः नसाज्वलंया परिकार, स्वास्थ्य शिविर, उत्पादनया कक्ष यानाः १२० कक्षा दुगु सिन्दुराकारं कनादिल । नेवाः नसाज्वलनय् बजि सेट, सन्याखुना, थीथी कथंया नेवाः नसाज्वलंया परिकार नं स्वकुमिपिनिगु आकर्षण जूगु खः ।