आन्दोलन जारी हे जुइगु उद्घोष

येँ – सरकारं गुथि सम्बन्धी विधेयक लित काःसां नं विधेयक विरुद्ध आन्दोलन धाःसा जारी हे जुइगु खँ आन्दोलन याना वयाच्वंपिंसं धाःगु दु ।
म्हिगः थाय्मदुइ जूगु ज्याझ्वलय् न्ववाःपिं वक्तातय्सं उगु खँ धाःगु खः । म्हिगः जूगु कोणसभाय् न्ववायेगु झ्वलय् आदिवासी जनजाति वकिलतय् संस्था लाहुर्निपया महासचिव शंकर लिम्बुं गुथि विधेयकं नेवाःतय्त अपमान याःगु धासें उकियात कयाः प्रधानमन्त्री केपी शर्मा ओलीं माफी फ्वनेमाःगु माग नं यानादीगु दु ।

सरकारं गुथि विधेयक हयाः नेवाःतय्गु नाडी छामे याःगु धासें वय्कलं नेवाःतय् गुथि धइगु नेवाःतय् निंतिं संविधान खः धयादिल । वय्कलं नेवाःतय्त छिन्नभिन्न यायेगु कथं विधेयक वःगु धासें उकियात खारेज यायेमाः धयादिल । अथे हे गुथि पुचःया महासचिव भरत जंगमं गुथि संस्थानं गुथियात शोषण द्वपं बियादिल ।

वय्कलं गुथि धइगु सरकारं जग्गा थुइकाच्वंगु धासें गुथि धइगु सामान्तवादया अवशेष मखुसें नेपाःया जीवन पद्धति व दर्शन खः । उकिया बारे अध्ययन मयासें सरकारं हःगु विधेयक खारेज यायेमाःगु खँ नं वय्कलं धयादीगु दु । ज्याझ्वलय् न्ववायेगु झ्वलय् नेवाः न्ह्यलुवा नरेशवीर शाक्यं नेवाःतय्त सामन्त खनीम्ह सरकारया प्रवक्ता गोकुल बास्कोटां राजीनामा बीमाःगु माग यानादिल ।

ज्याझ्वलय् सतक पीडित संघर्ष समितिया नायः सुमन साय्मि, ज्यापु समाज यलया अध्यक्ष चन्द्र महर्जनंपिंसं नं न्ववानादीगु खः । अथे हे गुथि विधेयकयात कयाः म्हिगः भ्वँतय् नं तःजिगु ¥याली पिहां वःगु दु । भ्वँतया थीथी थासं पिहां वःगु जुलुस बजारय् चाःहिलाः सभाय्
हिउगु खः ।

विरोध प्रदर्शनया झ्वलय् हलिं नेवाः गुथि, काभ्रे मिसा पुचः, थीथी जातीय संस्था, क्लब, गुथियार, सम्पदाप्रेमी लिसें स्थानीय जनतां ब्वति काःगु खः । प्रदर्शनया झ्वलय् गुथि विधेयक खारेज या, सम्पदा अतिक्रमण बन्द या, सम्पदा जिमिगु ज्यान खः गुथि जिमिगु प्राण खः, सम्पदाह्यःमि छप्पँ जुइनु धकाः नारा थ्वयेकूगु खः ।

अथे हे म्हिगः पशुपतिइ नं गुथि विधेयकयात कयाः प्रदर्शन जूगु दु । पशुपतिनाथ ग्वल पुचः समाजं गुथि विधेयकया विरोधय् पशुपतिनाथ मन्दिरं थीथी झाँकी व बाजागाजा सहित प्रदर्शन याःगु खः । विरोध जयबागेश्वरी, सिफल, लामपोखरी, चाबही गणेद्यः, चाबही चुक, मित्रपार्क, जयबागेश्वरी जुयाः पशुपति देगः न्ह्यःने सभा याःगु खः ।येँय् नं थीथी थासय् ¥याली पिकयाः सभाया प्रचार याःगु दु ।