नेपालभाषा ब्वँमिपिं अप्वयेकेत देय् दबूयात ज्ञापन पौ

येँ(नेपालभाषा टाइम्स)- नेवाः देय् दबूयात क्याम्पसय् नेपालभाषा विषय अध्ययन याइपिं ब्वँमिपिं अप्वयेकेत माग यासें ज्ञापन पौ लःल्हाःगु दु । नेवाः विद्यार्थी युनियनं थनया प्रदर्शनी मार्गय् च्वंगु रत्नराज्यलक्ष्मी क्याम्पस व बागबजारय् च्वंगु पद्मकन्या क्याम्पसय् नेपालभाषा विषय कयाः अध्ययन याइपिं ब्वँमिया ल्याः अप्वयेकेत माग यासें देय् दबूयात ज्ञापन पौ लःल्हाःगु खः ।

युनियनं क्याम्पसय् बीए तगिमय् नेपालभाषा ब्वनिपिं विद्यार्थी मदयाः कक्षा संचालन याये मफयाच्वंगुलिं ब्वँमिपिं अप्वयेकेत माग यासें देय् दबूयात ज्ञापन पौ लःल्हाःगु खः ।

देय् दबूया न्हूगु नेतृत्वया कार्यकाल सुथां लायेमाः धइगु कामना यासें नायः पवित्र वज्राचार्य व मिसा न्वकु रश्मिला प्रजापतियात भिंतुना बीगु झ्वलय् बीए तगिमय् नेपालभाषा विषय ब्वनिपिनिगु ल्याः अप्वयेकेत माग यासें युनियनया नायः रिदेन महर्जन, दुजः मनिष कुमार ‘मानव’सहितया पुचलं ज्ञापन पौ लःल्हाःगु खः ।

‘नेवाः विद्यार्थी युनियन नेवाः विद्यार्थीतय् मंकाः संगठन जुगु व संगठनया मू आज्जु धइगु हे नेवाः ब्वँमिपिंत नेवाः हक अधिकार बारे सचेतना थनाः संगठित यायेगु नापं नेपालभाषाया संरक्षण व प्रवद्र्धन यायेगु खः । लिसें नेपालभाषा ब्वंकेगु व क्षमता अभिवृद्धिया निंतिं थीथी ज्याझ्वः यायेगु संगठनया उद्देश्य जूगु’ संगठनं लःल्हाःगु विज्ञप्तीइ न्ह्यथनातःगु दु ।

रत्नराज्य, पद्मकन्यालिसें यलया पाटन संयुक्त क्याम्पसय् त्रिभुवन विश्वविद्यालयया नीति नियमकथं झिम्ह विद्यार्थी दत धाःसा जक नेपालभाषा विषय अध्ययन याके फइगु जूगुलिं थ्व हे महिनाया दुने कक्षा संचालन याकेगु ल्याखं विद्यार्थी भर्ना अभियानय् ग्वाहालि यायेत युनियनं इनाप याःगु दु ।