ज्यापु कल्याण भवनया जग स्वनेज्या

यल- ज्यापु समाजं ज्यापु कल्याण भवन निर्माण याइगु जूगु दु । समाजं निर्माण यायेत्यंगु कल्याण भवनया आः नकतिनि जग स्वनेगु ज्या जुल ।

यल महानगर प्रमुख चिरिबाबु महर्जनं यल महानगरपालिका वडा नं. ११ सैथु गणेश पलँध्वाखाय् दयेकेत्यंगु भवनया जग स्वनादीगु खः । ज्याझ्वलय् नवासें यल महानगर प्रमुख महर्जनं मेगा प्रोजक्टय् ग्वाहालि यायेगु ल्याखं समाजयात न्यादँया दुने न्यागू करोडया ग्वाहालि यायेधुंगु खँ कनादिल ।

लिसें वय्कलं विगतय् थः नं समाजया नायः जुयाः ज्या यायेधुंगु व थःगु कार्यकालय् थःलिसें मेपिं ग्वाहालिमिपिं व अग्रजतय् सल्लाहकथं ‘भिजन २०२०’ ज्याझ्वः हयागु जानकारी बियादिसें उकिया हे लिधंसाय् समाजयात थौैंया अवस्थाय् तक थ्यंके फुगुलिं थः तसकं लय्ताःगु नापं थःत थम्हं भाग्यमानी नं तायेका च्वना धयादिल ।

वइगु दिनय् समाजयात अझ न्ह्यःने यंकेत ‘२०३०’ वा ‘भिजन २०४०’या कार्ययोजना दयेका हयेत इनाप यानादिसें उकिया निंतिं थम्हं ग्वाहालि यायेगु प्रतिवद्धता प्वंकादिल ।

ज्याझ्वलय् सीटीइभीटीया प्रमुख दिपक पौडेलं थःपिंके पाठ्यक्रम तयार दुगुलिं भवन निर्माण जुइधुंकाः महानगर, सीटीइभीटी, व समाजं सहकार्य याना वनेमाःगु खँय् बः बियादिसें थुकिं सक्षम जनशक्ति तयार जुइगु विश्वास प्वंकादिल ।

समाजया वरिष्ठ उपाध्यक्ष सन्तमान महर्जनं समाजया दीर्घकालीन योजनायात सार्थक यायेत दक्ष जनशक्ति तयार यानाः सामाजिक व आर्थिक रुपं समुदाययात सबल यायेगु उद्देश्य दुगु खँ कनादिल ।

जग्गा दाता मदुम्ह चिरिमैं महर्जनं दान बियादीगु १२ आना जग्गाय् ४ गू करोड लागतय् अन्तर्राष्ट्रिय स्तरया भवन दयेकेत्यंगु खःसा उकिया निंतिं यल महानगरं आर्थिक ग्वाहालि याःगु खः ।

सम्बन्धित बुखँ

LEAVE YOUR COMMENTS