वडा परिसरया हिति उलेज्या

किपू- किपू नगरपालिका वडा नं. ६ परिसरय् च्वंगु चखुं हिति, बखुं हिति व ल्वहंहितिया उलेज्या याःगु दु । वडाअध्यक्ष न्हुछेबहादुर महर्जनया सभापतित्वय् जूगु छगू ज्याझ्वःया दथुइ मूपाहां येँ जिल्ला समन्वय समितिया प्रमुख शिवसुन्दर राजवैद्य व किपू नगरपालिकाया प्रमुख रमेश महर्जनं मंकाःकथं हितिया उलेज्या यानादीगु खः ।

ज्याझ्वलय् नवासें मूपाहां जिसस प्रमुख राजवैद्यं जिससया हे आर्थिक ग्वाहालिइ निर्माण जूगु वडा भवनया थगुने उलेज्या जूगु खँ कनादिसें भवन परिसरय् हिति दयेकेमाःगु माग जूकथं समितिपाखें ग्वाहालि यानागु खँ कनादिल । लिसें वय्कलं थुकथंया पूर्वाधार संरचनानापं मेमेगु बांलाःगु ज्या यायेत थःपिं तयार दु धयादिल ।

किपू नगर प्रमुख महर्जनं थौंकन्हय् चर्चाय् दुगु अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) नेपाःया संसदय् ब्यापक बहस व सहलह यायेमाःगु धयादिल । अमेरिकी सरकारं विकासया निंतिं बीगु धाःगु करिब ५५ गू अर्बया अनुदान ग्वाहालि कायेत संसदं पारित यायेमाःगु खँय् वय्कलं बः बियादिल ।

नेपालय् ततःधंगु परियोजनात वइगु इलय् छगू गिरोह हे सक्रिय जुयाः अज्याःगु विकासया ज्या याके मबीत स्वइगु खँ न्ह्यथनादिसें थुकिया शिकार किपू नगरपालिका जुयाः वनीगु फास्ट ट्रयाक नं जूगु खँ न्ह्यथनादिल ।

ज्याझ्वलय जिसस उपप्रमुख सरिता दाहाल, किपू नगरपालिकाया उपप्रमुख सरस्वती खड्का, ६ वडासदस्य सुनिल डंगोलं नं नुगःखँ तयादीगु खः ।