ने. सं. ११४४ कछलागा तृतीया -

जनतां त्वःती मखु

विश्व कोरोना भाइरसं पूर्णतया मुक्त जुइ मफुनि । तर दुर्भाग्यवस हाकनं मेगु खतरनाक भाइरसया प्रजातिया संक्रमण खतरा विश्वय् न्यना वयाच्वंगु बुखँत वयाच्वंगु दु । थ्व न्हूगु प्रजातिया भाइरस विश्वया ग्वीगू (९०) देशय् थ्यनेधुंकूगु दु । झीगु दक्षिणपाखेया जःलाखःला देय् नं थ्व न्हूगु प्रजाति ओमिक्रोन खनेदुगु खः । खतुं थ्व प्रजाति ओमिक्रोन न्हापां अफ्रिकाय् खनेदुगु खः । तर । थौं विश्व चिधने धुंकल । अफ्रिाकाया दूर देशं वःगु संक्रमण तापाक झीथाय् देशय् वये फइमखु धकाः धुक्क च्वने फइगु थौंया ई मखयेधुंकल । विश्वय् थौं गुगुं नं देशय् च्वंपिं मनूतय्त तापाःपिं, असम्बन्धित खंके फइमखु ।

विश्वया गुगुं देशय् च्वंपिं मनूतलिसे प्रत्यक्ष वा परोक्ष रुपं हरेक पल, घडी, अन्तर सम्बन्ध दयाच्वनी । कालबिल जुयाच्वनी । अफ्रिकां वःगु ओमिक्रोनया खतरां थौं युरोप पीडित, चिन्तित जुइ । संक्रमणया रुपय् थ्व विश्वभर न्यनीगु सम्भावना झं झं वृद्धि जुया वःगु खनेदइ । युरोपया अधिकांश देशय् ओमिक्रोनया संक्रमणया कारणं ‘लकडाउन’या पलाः छिनाः हयेधुंकल । माःगु सुरक्षाया विधिपाखे सतर्क जुया वयाच्वंगु खनेदइ । आः युरोपवासीतय् तःजिगु नखः ‘क्रिसमस’ पर्व न्ह्यःने वयाच्वंगु दु । ‘क्रिसमस’ युरोपवासीतय्सं धुमधाम उत्सव न्यायेकीगु ई । तर वयाच्वंगु ओमिक्रोनया खतरायात ध्यानय् तयाः क्रिसमसया पर्वय् मनूत निम्ह प्यम्ह जक मुने दइगु कडा नियम पिकायेधुंकल ।

आः युरोपया जक खँ जुइमखु । विश्वया अन्य मुलुकय् नं ओमिक्रोनया संक्रमणया निश्चित प्रवेश जुइ । भारतय् तकं नं खने दयेधुंकल धाःगु तथ्यं नेपालय् नं थ्वया आक्रमण निश्चित याइ । गुकी द्विविधाय् लायेमाःगु खँ मदु । उकिं थुकिया अवश्यम्भावी सम्भावनायात ध्यानय् तयाः नेपाल सरकारं थ्वपाखें सुरक्षित जुइगु पलाः छीमाः । कन्हय् संक्रमण तीव्र जुइकाः तिति धिकिं प्रतिरोधात्मक पलाः छी बलय् अकल्पनीय क्षति जुइधुंकी । देय् बरबादीया स्थितिइ लाये धुंकी ।

खतुं ओमिक्रोन न्हूगु प्रजाति जूगुलिं थ्वया प्रकृति, थुकिया उपचार विषयय् अनुसन्धान हे जुयाच्वंगु दु । खास तथ्य सीके मफुनि । थ्व कोरोना स्वयां खतरा मखु धकाः धाःगु गबलें विशेषज्ञतय् धापू खनेदइ । तर ठीक थ्व धापूया अःखः ओमिक्रोन कोरोना स्वयां खतरा धइगु विचाः नं पिहां वयाच्वंगु खनेदइ । थथे विविध विचाःत खनेदुसां थ्वया संक्रमणयात पनेत मनूत हुलमुलय् मजुइगु, मनूतलिसे सम्पर्कय् मवसे सुरक्षित जुयाः च्वनेगुयात हे विशेषज्ञतय्सं जोड बियाच्वंगु दु । थथे हे खःसा शायद नेपालय् नं ‘लकडाउन’ अपनय् याये मालीगु खःला ? छम्ह निम्ह ला ओमिक्रोनं पीडित नेपालय् नं दुगु बुखँ वयाच्वंगु दु । छम्ह निम्ह जक धकाः थ्व समस्याप्रति मिखा तिस्सिगु खँ मखु । जंगलया मि थें छम्ह निम्हं हजारौंया संख्याय् थ्वं च्याका बी फु ।
उकिं थ्व समस्या विकराल जुइ न्ह्यः हे सरकारं ओमिक्रोनया सम्भावित खतरा व ध्वंसयात पनेत माःगु पलाः इलय् हे छीमाः । देय्या प्रत्येक अस्पतालं आवश्यक व्यवस्थाया तयारी यायेमाः। दकलय् न्हापां वये फुगु संक्रमणया विषयय् जनतायात इलय् हे जागरणया अभियान न्ह्याकेमाः । जनस्तरय् ओमिक्रोनया संक्रमणं सुरक्षित जुइत छु छु नियमत पालन यायेमाः । जनतायात थुइकेमाः ।

‘ओमिक्रोन’ प्रजातियात पनेगु वासःत मवःनि । थ्व विषयय् अझ अनुसन्धान जुयातुं च्वंगु बुखँत पिहां वइ । तर कोरोनाया खोप कयाः तःपिंत थ्वं मर्णान्त हानि याइमखु धइगु नं बुखँत न्यने दु । उकिं कोरोनाया खोप देय्न्यंकं बीमाःगु व्यवस्था सरकारं शीघ्र यायेमाः । अझ कोरोनाया साविक खोप कयां जक मगाः ओमिक्रोन प्रजातिपाखें सुरक्षित जुइत ‘बुस्टर डोज’ नं अनिवार्य धइगु विशेषज्ञतय् धापू न्यने दु । थथे हे खःसा ‘बुस्टर डोज’ खोप नं जनस्तरय् शिघ्राति शिघ्र’ थ्यंकेमाल । कोरोनाया भय, त्रास, क्षतिपाखें पूर्णतया मुक्त मजुइकं हाकनं जनतां ओमिक्रोनया संक्रमणया मारं फये मालकि जनतां अकल्पनीय दुःख फये माली । आः ओमिक्रोनया संक्रमण वःसा वयात आकस्मिक धाये फइमखु । व पूर्व सूचना बिया वःगु ठहर जुइ ।

उकिं पूर्व सूचना वःगु समस्याया सामना यायेत पूर्व तयारी दयेकेमाः । विवेकपूर्ण पूर्व तयारीं समस्यालिसे सामना यायेत क्षमतावान याइ । खतुं थौंकन्हय् सरकारं ध्यान थःथःगु शक्ति रक्षाय् केन्द्रीत याये मालाच्वन । तज्याःगु भ्यगः स्वानातःगु थज्याःगु गठबन्धन सरकार ! गबले तज्याइगु खः । स्वयम सशंकित सरकार ! अय् धयां कुर्सिइ च्वंतले थःगु जिम्मेवारीं पलायन जुइ दइमखु । । जनतां त्वःती मखु ।