रक्तदाता समाजया स्वक्वःगु राष्ट्रिय महाधिवेशन

येँ – नेपाल स्वयमसेवी रक्तदाता समाजया स्वक्वःगु राष्ट्रिय महाधिवेशन जुल । ‘म्होतिं नं छखा छेँय् छम्ह स्वयमसेवी रक्तदाता अभियानय् ब्वति कायेनु’ धइगु नारालिसें उगु महाधिवेशन जूगु खः ।समाजया नायः प्रेमसागर कर्माचार्यया सभापतित्वय् न्ह्याःगु महाधिवेशनया उलेज्या नेकपा (माओवादी केन्द्र)या अध्यक्ष पुष्पकमल दाहाल प्रचण्डं यानादीगु खः ।

ज्याझ्वलय् नवासें अध्यक्ष प्रचण्डं हिया महत्व गुलि दु धइगु जनयुद्धया व थःथितिपिंत आवश्यक जूगु इलय् थःपिंसं थुइकागु जक मखसे उकिया पीडा नं महसुस याना धासें हिया उचित व्यवस्थापनया निंतिं पार्टीया अध्यक्ष व सरकारय् नं दुथ्याःगु ल्याखं थम्हं फक्व पहल यायेगु प्रतिवद्धता प्वंकादिल ।

अथे हे पाहांकथं झायादीम्ह प्रा. डा. भगवान कोइरालां नेपालय् हिदान याइपिं यक्व दःसां हिया उचित व्यवस्थापन जुइ फयाच्वंगु मदु धासें इलय् हि उपलब्ध मजुइगुलिं विरामीत वासः याये मखना सीगु स्वयेमालाच्वंगु पीडा प्वंकादिल ।

प्रा.डा. युवराज शर्मां लसकुस यानादीगु ज्याझ्वलय् विशेष पाहांकथं झायादीम्ह नेपाल रेडक्रस सोसाइटीया महामन्त्री देवरत्न धाख्वालिसें पाहांपिं दुर्गा पाठक, राजकुमार महतोपिंसं नं हिया महत्व व उकिया व्यवस्थापनया विषयय् नुगःखँ तयादीगु खः ।
‘स्वस्थ हि ः सकसिगुं निंतिं’ धइगु नारा नं पित बिउगु ज्याझ्वलय् ‘हाम्रो रगत’ नांया विशेषांक नं पित ब्वज्या याःगु खःसा हिदान ज्याझ्वः नं याःगु खः ।

ज्याझ्वःया सभापति कर्माचार्यं हिदातातय्सं बिउगु हि करिब ४० प्रतिशत हि सितिं वनाच्वंगु, दातां सितिकं बिउगु हिइ सरकारी निकायं उगुंथुगुं शीर्षकय् शुल्क कायेगु यानाच्वंगु खँय् असन्तुष्टि प्वंकुसे हि दातां बिउगु हि धलय् वांछ्वयेत व निःशुल्क काये दइगु व्यवस्था यायेत इनाप यानादिल ।

सम्बन्धित बुखँ

LEAVE YOUR COMMENTS