‘एमसीसी बारे जनमत संग्रह याकि’

येँ – एमसीसी बारे संसदया अन्तर्राष्ट्रिय सम्बन्ध समितिइ सहलह यायेगु खँ सभापति पवित्र निरौला खरेलं धयादीगु दु । सांसदतय्सं एमसीसी बारे खँ ल्ह्वनेवं सभापति खरेलं थ्व खँ धयादीगु खः ।

अन्तर्राष्ट्रिय सम्बन्ध समितिया म्हिगःया बैठकय् फुक्क धइथें दलया सांसदतय्सं एमसीसी बारे खँ ल्ह्वंगु खः । सांसदतय्सं एमसीसीयात प्रधानमन्त्री शेरबहादुर देउवा व माओवादी केन्द्रया अध्यक्ष पुष्पकमल दाहालं असोज १३ गते च्वःगु पौ कुटनीतिक मर्यादा अःखः जूगु धासें उकियात कयाः छानविन यायेत माग याःगु खः ।

एमसीसी बारे देय्न्यंकं बहस जुयाच्वंगु इलय् सांसदपिं सुम्क च्वनेगु उचित जुइ मखु खँ धासें सभापति खरेलं धयादिल, ‘एमसीसीयात कयाः नेपाःमि जनता आन्दोलित जुयाच्वंगु इलय् माननीयपिं न्हाय्पनय् चिकं तयाः च्वनेगु शोभनीय मजू ।’ बैठकय् माओवादी सांसद सुदन किरातीं एमसीसी नेपाःया हितय् मदु धासें विकासया नितिं खः धाइपिं नेतात जनमत संग्रहया नितिं तयार जुइमाःगु खँ धयादीगु खः ।