मन्त्री रेणु विरुद्ध प्रहरीइ उजुरी
येँ – भौतिक पूर्वाधार तथा यातायात मन्त्री रेणुकुमारी यादव विरुद्ध प्रहरीइ जाहेरी लाःगु दु । मन्त्री यादवं साम्प्रदायिक दंगा ब्वलनी कथंया अभिव्यक्ति बिउगु धासें काग्रेस नेता रञ्जित कर्णं मुलुकी अपराध ऐन कथं नेपाल प्रहरीइ जाहेरी बिउगु खः ।
मन्त्री यादवं वंगु माघ ५ गते रौतहटया गौरय् जनमत पार्टीया अध्यक्ष सीके राउतयात लक्षित यासें गौर हत्याकाण्ड हाकनं लिसा काये मालेफु धकाः अभिव्यक्ति बियादीगु खः । उगु अभिव्यक्तिं निगू समुदाय दथुइ साम्प्रदायिक द्वन्द्व ब्वलंकेत ग्वाहालि जूगु नेता कर्णया दाबी दु । नेता कर्णं म्हिगः हे सप्तरीया प्रमुख जिल्ला अधिकारी जनार्दन गौतम मार्फत प्रधानमन्त्री शेरबहादुर देउवायात ज्ञापन पौ बिसें यादवयात पदं चीकेत नं माग याःगु दु ।
मन्त्री यादवं थ्व स्वयां न्ह्यः हे विज्ञप्तिपाखे थम्हं सुं नं व्यक्तियात लक्षित यानाः अज्याःगु अभिव्यक्ति बियागु मदु धासें थःगु अभिव्यक्तियात कयाः भ्रम न्यंकेगु ज्या जुयाच्वन धकाः दावी यानादीगु दु ।
LEAVE YOUR COMMENTS