दक्षिण कोरिया विश्वकपय् छनोट

एजेन्सी- विश्वकप २०२२ या एसियन छनोट अन्तर्गत मंगलवाः बहनी जूगु कासाय् सिरियायात बुकाः दक्षिण कोरियां विश्वकपय् थासय् दयेकूगु दु । दुबइलय् जूगु छनोटय् कासाय् दक्षिण कोरियां सिरियायात २–० गोलं बुकूगु खः । दक्षिण कोरियाया निंतिं किम जिन सु व क्वान चाङ हुनं गोल याःगु खः । दक्षिण कोरिया झ्वलाकः झिक्वखुसी विश्वकप छनोट जूगु खः । थ्व पुचःया शीर्ष थासय् च्वंगु इरान विश्वकपया निंतिं छनोट जुइधुुंकूगु दु । दक्षिण कोरिया निगूगु थासय् दु । छनोटया मेगु कासाय् जापानं साउदी अरेबियायात २–० गोलं बुकूगु दु । अथे हे अष्टे्लियां ओमानलिसे निगू निगू गोलया बराबरी म्हितूगु दु ।

मेखे दक्षिण अमेरिकी छनोट कासाय् ब्राजिल, अर्जेन्टिना व उरुग्वे त्याःगु दु । बुधवाः सुथय् जूगु कासाय् अर्जेन्टिनां कोलम्बियायात, ब्राजिलं पाराग्वेयात व उरुग्वें भेनेजुएलायात बुकूगु खः । ब्राजिलं पाराग्वेयात ४–० गोलया तःधंगु अन्तरं बुकूगु खः । ब्राजिलया निंतिं राफिन्हा, फिलिपे कोन्टिन्हो, एन्टोनी व रोड्रिगाें छगू छगू गोल याःगु खः । विश्वकपया निंतिं छनोट जुइधुंकूगु ब्राजिल पुचःया शीर्ष थासय् दु ।

छनोटया मेगु कासाय् पुचःया निगूगु थासय् च्वंगु अर्जेन्टिनां कोलम्बियायात १–० गोलं बुकल । अर्जेन्टिनाया निंतिं कासाया छगू जक गोल लोउटारो मार्टिनेजं याःगु खः । अर्जेन्टिनां नं विश्वकपय् छनोट जुइधुंकूगु दु । मेखे थ्व कासा बुइवं कोलम्बियाया धाःसा विश्वकप छनोट जुइगु सम्भावना म्हो जूवंगु दु । पुचःया न्हय्गूगु थासय् दुगु कोलम्बियां विश्वकपय् छनोट जुइगु खःसा ल्यंदनिगु दक्व कासा त्याके हे माःसा मेगु टिमया कासाया लिच्वः नं पिइमालीगु अवस्था दु ।

मेखे भेनेजुएलायात बुकाः उरुग्वें विश्वकप छनोट जुइगु सम्भावनायात बल्लाकूगु दु । उरुग्वें भेनेजुएलायात ४–१ गोलं बुकूगु खः । उरुग्वेया निंतिं रोड्रिगो बेन्टानकर, जिओरजियन एराकाइटा, इडिसन काभानी व लुइस स्वारेजं गोल याःगु खः । भेनेजुएलाया निंतिं जोसेफ मार्टिनेजं छगू जक गोल याःगु खः । उरुग्वे पुचःया प्यंगूगु थासय् दु ।

अथेहे छनोटया मेगु कासाय् पुचःया स्वंगूगु थासय् दुगु इक्वेडरं न्यागूगु थासय् दूगु पेरुलिसे १–१ गोलया बराबरी म्हितल । विश्वकपय् दक्षिण अमेरिका पाखें पुचःया शीर्ष प्यंगू टिम तप्यंक छनोट जुइसा न्यागूगु थासय् लाःगु टिमं प्लेअफ म्हितेमाली ।