नापी समस्या सहजीकरण यायेत सहलह

किपू – किपू नगरपालिकाया ग्वसालय् किपू नगर क्षेत्रया नापी समस्यायात सहजीकरण यायेगु ल्याखं छगू सहलह जूगु दु । किपू नगरपालिकाया प्रमुख रमेश मजर्हनया अध्यक्षताय् किपू नगरपालिका ज्याकुथिइ हे उगु सहलह जूगु खः ।

सहलह मुँज्याया इलय् किपू नगरया सार्वजनिक थाय् व जग्गायात संरक्षण यायेगु ल्याखं किपू नगरपालिका व उगु लागाया नापी ज्याकू कलंकीपाखें नापी यानाः सार्वजनिक जग्गा संरक्षण यायेगु खँ क्वःछिउगु दु ।

थ्व हे झ्वलय् किपू नगरपालिका वडा नं ५ य् वितरण याये ल्यं दुगु लालुर्जा नं याकनं वितरण यायेगु व किपू नगरपालिका वडा नं. ४ (साविकया मच्छेगां गाविस व बाहिरी गाउँ गाविस वडा नं. ६ व ७)य् नं हाकनं जग्गा नापी शुरु यायेगु मुँज्यां क्वःछिउगु दु ।

सहलह मुँज्याय् किपू नगरपालिकाया उपप्रमुख सरस्वती खड्कालिसें १ वडाअध्यक्ष हर्ष महर्जन, २ वडाअध्यक्ष रमेशमान डंगोल, ३ वडाअध्यक्ष राजेन्द्र महर्जन, ५ वडाअध्यक्ष राजेन्द्रकुमार महर्जन, ८ वडाअध्यक्ष विनोद महर्जन, ९ वडाअध्यक्ष गंगाराम महर्जन व १० वडाअध्यक्ष अमन महर्जनया उपस्थिति दुगु खः ।

थुकथं मुँज्याय् थीथी वडाया वडासदस्यलिसें किपू नगरपालिका प्रशासन शाखा प्रमुख जनक थापा, नगर प्रमुख सचिवालयया विकास महर्जन, मालपोत ज्याकू कलंकीया प्रमुख खिमबहादुर राना व अधिकृत प्रकाश घिमिरेया नं उपस्थिति दुगु खः ।

सम्बन्धित बुखँ

LEAVE YOUR COMMENTS