स्वंगूगु लहरया इपिसेन्टर

येँ- देशय् न्यना वंगु कोरोनाया स्वंगूगु लहरया इपिसेन्टर स्वनिगः जूगु दु । स्वनिगः दुने नं राजधानी येँ देय् दकलय् अप्वः संक्रमित दुगु थाय् जूवंगु दु ।

म्हिगः न्हिछिया दुने देय्न्यंकं छथुं हे १० हजार २५८ म्ह न्हूपिं कोरोना संक्रमितत पिहां वःगु खः । छन्हुया दुने छक्वलं थुलि मात्राय् कोरोना संक्रमितत लूगु नं न्हापांखुसी खः । थ्व स्वयां न्ह्यः नेपालय् छन्हुं ९,३१७ म्ह तक संक्रमित लूगु अभिलेख दुसा छन्हुं १० हजार स्वयां अप्वः थ्यंगु नं थःहे छगू कीर्तिमान जूगु दु ।

वंगु २४ घौया दुने मुक्कं २२,८२८ म्हेसिया परीक्षण याःगुली १० हजार स्वयां अप्वः पोजिटिभ पिहां वःगु खः ।

कोरोना संक्रमितया ल्याः यदि थ्वहे गतिं थहां वनाच्वन धाःसा माघया स्वंगूगु वाः तक थ्यनीबलय् न्हिं २० हजारया दरं संक्रमितत अप्वया वनीगु प्रक्षेपण स्वास्थ्य तथा जनसंख्या मन्त्रालयं याःगु दु । म्हिगः संसदया शिक्षा तथा स्वास्थ्य समितिइ रोग नियन्त्रण महाशाखाया निर्देशक डा. कृष्णप्रसाद पौडेलं थज्याःगु भविष्यवाणी यानादीगु खः । थौंकन्हय् आपालं ल्याखय् विरामीत वःसां अस्पताल वनेमाःपिं विरामी धाःसा खास हे खने मदु । तर माघया स्वंगूगु वालंनिसें अस्पताल भर्ना जुइमाःपिं विरामीत नं यक्व खने दये फुगु खँ धाःगु दु । अस्पताल भर्ना यायेमाःपिं विरामीत मध्ये नं करिब ४०० म्ह विरामीया स्वास्थ्य जटिल जुइफुगु अनुमान नं याःगु दु ।

म्हिगः न्हिछिया दुने थपे जूपिं १० हजार स्वयां अप्वः संक्रमित मध्ये नं करिब ६ हजारम्ह संक्रमित धाःसा स्वनिगलय् जक थपे जूगु खः । उकी नं राजधानी येँय् जक ४,४०० म्ह, यलय् ९७५ म्ह व ख्वपय् ५७० म्ह संक्रमित थपे जूगु खः । थ्व ल्याः स्वयेबलय् आः पिहां वयाच्वंगु स्वंगूगु लहरया केन्द्र स्वनिगः हे जुयाच्वंगु खनेदु ।

स्वनिगलय् कोरोनाया लहर व्यापक जुया वनाच्वंसां सरकारं धाःसा थनया संक्रमण नियन्त्रण यायेगु लागिं स्थानीय तहलिसे छुं कथं सल्लाह तकं मयाःगु खँ पिहां वःगु दु । येँ महानगरपालिकाया मेयर लिसें उपत्यका मेयर फोरमया नायः विद्यासुन्दर शाक्यं स्वनिगलय् कोरोना नियन्त्रणया लागिं आः तक सीसीएमसी व सरकारं तकं थःपिंलिसे छुं सल्लाह मयाःगु खँ कँसें न्हापा थें आः नं कोरोना नियन्त्रणया लागिं ग्वाहालि यायेत थःपिं तयार दुगु खँ कनादीगु दु ।

सम्बन्धित बुखँ

LEAVE YOUR COMMENTS