ओकुबहालय् समभ्वय् मजुइगु

यल – दँय्दसं माघकृष्ण पंचमी कुन्हु थनया रुद्रवर्ण महाविहार (ओकुबहाः)य् जुइगु समभ्वय् (संघभोजन) थुगुसी नं मजुइगु जूगु दु । कोरोना महामारीया कारणं सरकारं नीन्याम्ह स्वयां अप्वः मनू मुने मदइकथं प्रतिबन्ध तयातःगुलिं समभ्वय् मजुइगु जूगु खः । थगुने नं कोरोनाया कारणं थन जुइगु समभ्वय् मजूगु खः ।

थुगुसी रुद्रवर्ण महाविहार संरक्षण समितिया न्हूधाः नं जुइमाःगु खःसा कोरोनाया कारणं उगु ज्याझ्वः नं प्रभावित जूगु दु । थ्व बहादलय् शाक्य कुलपुत्रपिं बरे छुइ धुनेवं सर्वसंघया दुजः जुइ । थन सर्वसंघय् ७९५ म्ह दुजः दु ।