‘सभामुखं कि माफी फ्वनेमाः, कि राजीनामा बीमाः’

येँ– एमाले महासचिव शंकर पोखरेलं सभामुखं गल्ती भिंकेमाःगु वा राजीनामा बीमाःगु माग यानादीगु दु । संसद बैठकय् न्ह्यानाच्वंगु पंगः चीकेत सत्ता पक्षं हे भूमिका म्हितेमाःगु धासें वय्कलं नेकपा एमालें समाजवादी पार्टीया सांसदपिंत पद मुक्त यायेत माग यानागु, तर सभामुखं चिउताः मक्यंगु धासें सभामुखं गल्ती भिंकेमाःगु वा राजीनामा बीमाःगु खँ धयादीगु खः ।

समाजवादी सांसदयात कारबाही यायेमाः धासें एमालें संसद सचिवालयय् बिउगु निवेदन कथं कारबाही मजूगु धासें एमालें संसदय् पंगः थना वयाच्वंगु खः । वंगु बुधवाः निसें शुरु जूगु संसदया झिक्वःगु बैठक नं एमालें पंगः थंगु खः । सभामुख अग्निप्रसाद सापकोटां कारबाही यानापिं झिंप्यम्ह सांसदयात पदमुक्त मयाःगु धासें एमालें भदौ २३ गते निसें संसदय् पंगः थना वयाच्वंगु खः ।