लगंया च्वाकंबहि आगंछेँ शिलान्यास

येँ – लगंया च्वाकंबहीया आगंछेँ पुननिर्माणया शिलान्यास जूगु दु । येँ महानगरपालिका २१ वडास्थित लगं त्वालय् च्वंगु कीर्तिपुण्य महाविहार, च्वाकंबहीया आगंछेँया शिलान्यास यानादिसें येँ महानगरपालिकाया मेयर विद्यासुन्दर शाक्यं येँ महानगर दुने पुनःनिर्माण यायेमाःगु आपाः धयाथें सम्पदा पुनःनिर्माण जुइ धुंकूगु दु खँ धयादीगु दु ।

वय्कलं धयादीगु दु, ‘छुं दयेके सिधये धुंकूगु, छुं दयेके ज्या न्ह्यानाच्वंगु दनि । जिमिसं दयेकेगु कुतः यानाच्वनागु छुं छुं सम्पदा स्थानीय विवादया हुनिं न्ह्यःने न्ह्याःवने फयाच्वंगु मदु । छुं छुं गुथि संस्थान व पुरातत्व विभागया स्वामित्वय् लानाच्वंगुलिं प्रक्रियाय् वने मफयाच्वंगु दु । थ्व बाहेक मेगु सम्पदाय् महानगरपालिकां थःगु हे लगानिइ पुनःनिर्माण यानाच्वनागु दु ।

सम्पदा पुनःनिर्माणया जानकारी बीगु झ्वलय् मेयर शाक्यं धयादिल, ‘शिलान्यास जूगु छुं नं ज्या ध्यबा मदयाः दयेकेगु ज्या दीमखु । पुनर्निर्माणया निंतिं महानगरपालिकां योजनाकथंया ध्यबा विनियोजन याये धुनागु दु ।’

‘आः पुनःनिर्माण जुयाच्वंगु सम्पदा वइगु सछि दँतक नं सामान्य मर्मत जक याःसा गाइ’ पुनःनिर्मित सम्पदाया गुणस्तरया विषय जानकारी बिसें मेयर शाक्यं धयादिल, जिमिसं जिमिगु कार्यकालय् तत्काल प्रभाव खने दइगु व लिपाथ्यंक ल्यना च्वनीगु योजनायात प्राथमिकता बियाः संचालन यानाच्वनागु दु ।

अथे हे ज्याझ्वलय् बागमती प्रदेश सभाया दुजः डा. अजयक्रान्ति शाक्यं, येँँ महानगरपालिकां अन्तर–सरकार समन्वयपाखें पूर्वाधार निर्माण व सम्पदा पुनःनिर्माणय् च्वछायेबहगु ज्या यानाच्वंगु थःम्हं तायेकाःगु धयादीगु दु । ‘पूर्वाग्रह मतसे याःगु थुगु ज्यां महानगरपालिकाया मौलिकता ल्यंकातयेगुलिइ तःधंगु योगदान दयाच्वंगु दु’ डा. शाक्यं धयादिल ।

स्वतँजाः व म्हतिं छगू तल्ला ६३० बर्गफीट दइगु थुगु बही दयेकेत करिब १ करोड ५४ लख लागत अनुमान यानातःगु खःसा पुनर्निर्माणया निंतिं समन्द्री कन्स्ट्रसनं १ करोड ५ लाख तकां ठेक्का काःगु दु । हनुमानध्वाखा दरबार संरक्षण ज्याझ्वःपाखें कार्यान्वयन जूगु पुनःनिर्माण वइगु ०७९ कार्तिक १० गते दुने सम्पन्न यायेमाः ।

सम्बन्धित बुखँ

LEAVE YOUR COMMENTS