येँ महानगरय् एकीकृत बजाः अनुगमन
येँ – येँ महानगरपालिकां महानगरया बजाः क्षेत्रयात एकीकृत अनुगमनया माध्यमं व्यवस्थापन याइगु जूगु दु । येँ महानगरं महानगर लागा दुने स्वन्ति व छठ पर्व लक्षित बजाः एकीकृत अनुगमनया माध्यमं व्यवस्थापन यायेत्यंगु खः ।
येँ महानगर उपप्रमुख हरिप्रभा खड्गी श्रेष्ठया अध्यक्षताय् च्वंगु बैठकं उगु निर्णय याःगु खः । उपभोक्ता हित संरक्षण समितिया संयोजक तकं जुयाच्वादीम्ह उपप्रमुख खड्गी श्रेष्ठया अध्यक्षताय् च्वंगु बैठकं एकीकृत बजाः अनुगमनया झ्वलय् नसात्वँसा ज्वलंलिसें तरकारि, सिसाबुसा, मरमसला, स्वन्तिया निंतिं आवश्यक मसला व मेमेगु ज्वलं स्वां, स्वांमाः, कृषिजन्य सामग्री, न्या, ला, दुरु लगायतया उपभोग्य ज्वलंया नं भाः व गुणस्तरया अनुगमन याइगु जूगु दु ।
उपप्रमुख खड्गी श्रेष्ठं अनुगमन याइगु निकाय आपालं दुगु व अनुगमन याइपिं न्हिथं व्यापारीयाथाय् वनेबलय् इमिसं असहज महसुस यायेफु धासें थःपिंसं सुयात नं असहज महसुस याकेगु ज्या जुइमखु धयादिल ।
सेवा व वस्तुया गुणस्तर व भाःयात व्यवस्थित यायेगु जक थःपिनिगु लक्ष्य खः धासें वय्कलं धयादिल, ‘स्वच्छ बजाः व्यवस्थापनया निंतिं याइगु अनुगमनं उचित व्यापारिक क्रियाकलाप याइपिंत समस्या मजुइमा, अनुचित क्रियाकलाप याइपिंत उन्मुक्ति मदयेमा ।’
महानगरपालिकाया नेतृत्वय् स्वन्ति व छठयात लक्षित यानाः वाणिज्य विभाग, जिल्ला प्रशासन ज्याकू, खाद्य प्रविधि तथा गुण नियन्त्रण विभाग, नेपाल गुणस्तर तथा नापतौल विभाग व उपभोक्ता अधिकारकर्मिसहितया पुचलं बजाः अनुगमन याइगु जूगु दु ।
मोहनिया इलय् महानगरं याःगु बजाः अनुगमनया समीक्षा नं याःगु बैठकय् कृषि विभाग, पशु सेवा महाशाखां खाद्यान्न, तरकारि, सिसाबुसा, चौपायाः बजाः व पशुजन्य खाद्यवस्तु सम्बन्धी विवरण नं न्ह्यब्वयादीगु खः ।
बैठकय् योजना तथा अनुगमन मूल्यांकन इकाइ प्रमुख नरेन्द्रविलास वज्राचार्यं तालिकावद्ध अनुगमनया तयारी जुयाच्वंगु जानकारी बियादीगु खः । अथे हे समितिं पर्व विशेषलिसें अनुगमनयात निरन्तरता बिया वनेगु नं निर्णय याःगु दु ।
LEAVE YOUR COMMENTS