युुरोपा लिग – वेस्टह्याम, लियोन व नापोली त्यात

एजेन्सी- युरोपा लिगय् इग्लिसं क्लब वेस्टह्यामं बेल्जियमया क्लब जेन्केयात बुकूगु दु । समूह ‘एच’ अन्तर्गत शुक्रवाः सुथय् जूगु कासाय् वेस्टह्यामं जेन्केयात ३–० गोलं बुकूगु खः । वेस्टह्यामया निंतिं क्रेग डाउसन, इसा डियोप व जारोड वावेनं छगू छगू गोल याःगु खः । लिगया स्वंगुलिं कासा त्याकाः वेस्टह्याम पुचःया शीर्ष थासय् दु ।

समूह ‘ए’ या कासाय् फ्रेन्च क्लब लियोनं स्पार्टा प्राहायात बुकल । निगू गोलं लिउने लानाच्वंगु लियोनं स्पार्टायात ४–३ गोलं बुकूगु खः । कासाय् लुकास हरसलिनं निगू गोल यानाः स्पार्टायात निगू गोलया अग्रता बिउगु खः, तर लियोनया कार्ल टोको व होउसिम एउअरं छगू छगू गोल यानाः कासायात बराबरी हयाबिल । लियोनया निंतिं लुकास पाक्युटं गोल यायेवं कासाय् लियोनं ३–२ गोलं अग्रता कालसा कार्ल टोको लियोनया निंतिं हाकनं मेगु छगू गोल यानाः कासाय् ४–२ गोलया अग्रता काल । इन्जुरी टाइमय् स्पार्टाया लाडिस्लाभं गोल यानाः कासायात ४–३ गोलया स्थितिइ थ्यंकूगु खः । थ्व हे पुचःया मेगु कासाय् रेन्जर्सं ब्रोन्डवी आइएफयात २–० गोलं बुकल । लियोन पुचःया शीर्ष थासय् दु ।

युरोपा लिगया समूह ‘सी’या कासाय् इटालियन क्लब नापोलीं पोल्यान्डया क्लब लेजियायात ३–० गोलं बुकल । नापोलीया निंतिं लोरेन्जो इनसिंन्गें, भिक्टर ओसिमहेन व माटियो पोलिटानों छगू छगू गोल याःगु खः । नापोलीया लिगय् थ्व न्हापांगु विजय खः । कासाय् बूसां लेजिया पुचःया शीर्ष थासय् दु ।

थुखे युरोपा कन्फरेन्स लिगय् इंग्लिस क्लब टोटनहम बूगु दु । डच क्लब भिटेसं टोटनहमयात १–० गोलं बुकूगु खः । भिटेसयात त्याकेगु निंतिं माक्सिमिलियनं गोल याःगु खः । युरोपा कन्फरेन्स लिगया मेगु कासाय् इटालियन क्लब रोमायात नर्वेयागु क्लब बोडो ग्लिम्टं ६–१ गोलया तःधंगु अन्तरं बुकल । बोडो ग्लिम्टया निंतिं एरिक बोथिम व ओला सोल्बाकेनं निगू निगू गोल यातसां प्याट्रिक बर्ज व अमहल पेल्लिग्रनों छगू छगू गोल याःगु खः । रोमाया चाल्र्स परेजं छगू जक गोल याःगु खः ।

सम्बन्धित बुखँ

LEAVE YOUR COMMENTS