कन्हय् नेपाः व इरान दथुइ धेंधेंबल्लाः

एजेन्सी÷ ताजिकिस्तानय् जुइगु एएएफसी यु–२३ छनोट कासाय् सोमवाः नेपाः व इरान दथुइ धेंधेंबल्लाः जुइत्यंगु दु । समूह ‘बी’इ लाःगु नेपालं इरानलिसे सोमवाः स्थानीय ईकथं ४ः४५ ताः इलय् म्हिती । नेपाःया यु–२३ या टिम वंगु मंगलवाः एएएफसी यु–२३ छनोट कासा म्हितेत ताजिकिस्तान वंगु खः । नेपाःया टिमय् साफ च्याम्पियनसिप म्हितूगु सिनियर टिमया खुम्ह कासामि दुथ्याः । टिमया प्रशिक्षक बालगोपाल महर्जन खः । नेपालं ताजिकिस्तानय् शनिवाः इन्डोनेसिया नाप छगू मैत्रीपूर्ण कासा नं म्हितेधुंकूगु दु ।

कासाय् नेपाः २–० गोलं बूगु खः । एएफसी यु–२३ छनोट कासाय् नेपाः दुथ्याःगु पुचलय् ताजिकिस्तान, इरान व लेबानान दु । सोमवाः इरानलिसे न्हापांगु कासा म्हितेधुकाः नेपालं निगूगु कासा अक्टोबर २८ य् ताजिकिस्तानलिसे व अक्टोबर ३१ य् लेबनानलिसे म्हिती ।

ताजिकिस्तानय् आइतवाः जूगु प्रि–म्याच कन्फरेन्सय् नेपाःया मुख्य प्रशिक्षक बालगोपाल महर्जनं विपक्षी टिम बल्लाःसां नेपालं नं बांलाःगु प्रदर्शन याइ धाःगु दु । नेपाःया स्वंगुलिं विपक्षी टिम बल्लाःगु टिम जूगु वास्तविकताया थःपिंसं स्वीकार यानागु, तर फक्व बांलाक म्हिताः बांलाःगु लिच्व हयेगु महर्जनं धाःगु दु । प्रशिक्षक महर्जनं छुं कासामि साफ च्याम्पियनसिप म्हितावःगुलिं तयारीया निंतिं ई म्हो जक दूगु नं धाःगु दु । टिमया कप्तान व गोलकिपर अर्पण कार्कीं टिम तयारी बांलाःगु व कासा म्हितेत तयार दुगु धाःगु दु । कप्तान कार्की इन्डोनेसियालिसे जूगु मैत्रीपूर्ण कासां थःपिंत ग्वाहालि याःगु नं धाःगु दु ।

छनोटय् शीर्ष जूगु टिमं एएफसी यु–२३ एसियन कप छनोट म्हितेखनी । अथे हे निगूगु थासय् लाःगु प्यंगू टिम नं एसियन कप छनोटय् छनोट जुइ । एसियन कप छनोटया निंतिं ४१ गू टिमयात ११ गू पुचलय् विभाजन यानातःगु दु । यु २३ एसियन कप सन् २०२२ जुन १ तारिख निसें १९ तारिख तक उज्जवेकिस्तानय् जुइ । नेपालं आतक छनोट पार याःगु मदुनि ।

सम्बन्धित बुखँ

LEAVE YOUR COMMENTS