ने. सं. ११४६ बछलागा चौथी -

भाषा आयोगया रिपोर्टयात एकेदेमिया लसकुस

येँ – भाषा आयोगपाखें नेपाल सरकारयात लःल्हाःगु प्रतिवेदनय् बागमति प्रदेशय् सरकारी ज्याखँय् औपचारिक ल्याखं छ्यलाबुला यायेगु कथं नेपालभाषा उपयुक्त धकाः याःगु सिफारिसयात नेपालभाषा एकेदेमिं अतिकं सकारात्मक धासें लसकुस याःगु दु ।

एकदेमिं छगू वक्तव्य पिथँसें संघीय लोकतान्त्रिक गणतन्त्र कथं भाषिक अधिकार सुनिश्चित यायेगु कुतः जुइमाः धकाः भाषा आयोगयात एकेदेमिपाखें आधिकारिक धारणा न्ह्यब्वयेगु लिसें माःगु सुझाव बियागु खँ न्ह्यथँसें एकेदेमिं बिउगु सुझावत मध्ये नेपालभाषायात प्रादेशिक सरकारया ज्याखँय् आधिकारिक छ्यलाबुलाय् हयेमाः धयागु नं छगू मू सुझाव जूगु खँ न्ह्यथनातःगु दु ।

अथेहे एकेदेमिं नेपालभाषायात सरकारी ज्याखँय् छ्यलेगु सम्बन्धय् सम्बन्धित निकाययात छुं नं कथंया ग्वाहालि व सुझाव माःसा एकेदेमिं ग्वाहालि याइगु खँ नं धयातःगु दु ।