स्वयम्भूया ट्वाइलेट पार्क विश्व उत्कृष्ट

येँ- येँ महानगर पालिका वडा नं. १५स्थित विश्व सम्पदाया धलखय् लानाच्वंगु स्वयम्भूइ च्वंगु ‘ट्वाइलेट पार्क’ विश्वया हे उत्कृष्टया धलखय् दुथ्यायेत ताःलाःगु दु । स्वयम्भूया ‘ट्वाइलेट पार्क’ अन्तर्राष्ट्रिय प्रतिस्पर्धाय् उत्कृष्ट न्यागूया धलखय् लाःगु खः ।

स्वीडेनय् विश्व लः महोत्सवया झ्वलय् जूगु सफाइ विधाय् ट्वाइलेट पार्क दकलय् न्हापां उत्कृष्ट झिगुलिइ लाःगु खःसा अनं नं उत्कृष्ट जुयाः न्यागू थासय् लाःगु खः । ‘सीवी वल्र्ड वाटर विक’ नामं जूगु महोत्सवय् विश्वन्यंकं ८० गू स्वयां अप्वः संघसंस्थापाखें निवेदन दुहां वःगु खः ।

‘एरोसन ट्वाइलेट’ नां बियातःगु स्वयम्भूया थुगु ट्वाइलेट पार्कयात संयुक्त राष्ट्र संघं सन् २०२० य् उत्कृष्ट चःबि ठहर यानाः दिगो विकास अवार्ड बीधुंकूगु दु । अथे हे सन् २०२१ य् ग्लोबल इनोभेसन च्यालेन्जय् नं उत्कृष्ट चःबिया अवार्ड त्याकेत ताःलाःगु खः ।

थुगु चःबिं पिहां वइगु फोहरपाखें बायोग्यास उत्पादन, अतिरिक्त आम्दानीया स्रोत, पसः संचालन, पूर्णरुपं सरसफाइ, महिलामैत्री ट्वाइलेट पार्क लः व वातावरण क्षेत्रय् क्रियाशील प्रकाश अमात्यया अवधारणाकथं निर्माण जूगु खः ।

थुगु चःबिया ठोस व तरल फोहरयात धलय् व्यवस्थापन मयासे उर्जा उत्पादन यायेगु ज्याय् प्रयोग याना वयाच्वंगु दु । उत्कृष्ट लाःपिनिगु नां वइगु नोभेम्बर महिनाय् घोषणा याइगु जूगु दु ।