मन्त्रिमण्डल विस्तार लिबाःगु लिउनेया विकृत राजनीति

प्रधानमन्त्री शेर बहादुर देउवाया सरकार धाल धायेवं हे ५६ म्हेसिया जम्बो मन्त्रिमण्डल धकाः नां जाः । थ्व उबलय्या खँ खः । तर आः लत्या तक हे देउवा सरकार न्याम्हेसिया जक जुयाच्वंगु दु । शेर बहादुर देउवां मन्त्रिमण्डलया विस्तार यानाः उकियात पूर्णता बिइगु ला गन खः गन गठबन्धन दलतय्गु दथुइ मन्त्रिमण्डल विस्तार यायेगु सहमति जुल हँ धाःगु गुबलें न्यनेमनंनिगु समाचार न्यनेमाला च्वंगु दु ।

थ्वया हुनि खः, उबलय् मन्त्रीया आकांक्षीत ५५ म्ह दुगु खःसा आः व सिकं नं तसकं हे आपाः जुयाः न्ह्यंकाः न्ह्यंकेमफइगु जुइधुंकल । माधव नेपालया दल दर्ता जुइ धुनेवं मन्त्रिमण्डल विस्तार जुइगु धाःगु खः । तर मन्त्रिमण्डल विस्तार जुल धायेवं उकी मलाःपिं नेतात कार्यकर्ता सहित एमालेय् हे च्वनेफुगु खतरा दयाः निर्वाचन आयोगं बिउगु भाद्र २२ गतेया न्हि मवंक मन्त्रिमण्डल विस्तार मजुइगु खनेदुगु दु ।

खतुं नेपाः ज्ञानेन्द्रं नं प्रधानमन्त्री नियुक्ति यायेत टेन्डर हे चायेकूगु देय् खः । थनया प्रधानमन्त्री व मन्त्री पद हे लीलाम बढाबढ जुइगु थाय् खः । थ्वयां न्ह्यःया ओली सरकारं नं धुवांधू मन्त्रिमण्डल हीकाः पालंपाः थः मनूतय्त मन्त्री दयेकूगु खः । थः मनू दयेकेगु अस्त्र नं प्रधानमन्त्री व मन्त्री पद हे खः । जुजुं शासन काःबलय् हे संसदीय व्यवस्थाय् विकृति व विसंगति तच्वल, भ्रष्टाचार अप्वल धकाः धाःगु खः । धाःसा आः ला विकृति व विसंगति हे संस्थागत जुयाः मान्यता प्राप्त जुइधुंकूगु अवस्था खः । विकृति व विसंगति हे राजनीति जुइधुंकूगु अवस्था खः ।

विकृति व विसंगतिइ ल्हाः तयेमफुत धाःसा उम्ह मनू राजनीतिं कुतुं वयाः सतकछाप जुइगु निश्चित खः । न्हापा प्रधानमन्त्री दयेकेगु खेलय् जक सांसद कुनीगु खः, सांसदतय्त विदेश भ्रमणय् यंकीगु खः । तर आः ला माधव कुमार नेपालं राजनीतिक दल चायेकेत तकं चन्दागिरी रिसोर्टय् सांसद व केन्द्रीय सदस्य मुंका तयेमाल । मखुसां ओलीं सालाकाइ धकाः ग्यायेमाल । खःगु ज्या जुइमा, मखुगु ज्या जुइमाः, उकथं यायेमफुपिं मनूतय्सं राजनीति हे मयाःसां जिइ धुंकल । माधव नेपालं चन्द्रागिरी रिसोर्टय् पुलेगु ध्यबा मदुगु खःसा निर्वाचन आयोगय् मखु, पशुपतिइ वनाः जोगी जू वनेमालीगु अवस्था खने हे दत ।

माधव नेपाल थृुज्वःम्ह पूर्व प्रधानमन्त्रीया हैसियत ला उज्वःगु जुल, झाँक्री छम्हेस्यां लप्पु ज्वंकाः निर्वाचन आयोगय् दुहाँ वनेमाल धकाः धाःसा नेपाः राष्ट्रिय पार्टीया दल दर्ता हे निर्वाचन आयोगं खारेज यानाबिल धकाः अजू चायेमाःगु छाय् ? माधव नेपाल नेतृत्वय् नेकपा (एकीकृत समाजवादी) धकाः दर्ता जुइफुगृु हुनिइ प्रधानमन्त्री जुयाच्वंम्ह शेर बहादुर देउवां न्हूगु अध्यादेश जारी यानाबिउगु व सभामुखं १४ म्ह सांसदतय्गु कारवाही पनातःगुलिं जक सम्भव दुगु खः । थ्व खँ सकसिन खं हे खन । नत्र ओलीं थुगु पार्टी दर्ता जुइकेमबीगु धकाः हे कसरत ला याःगु हे खः । थुकथंया अवस्थाय् सर्वसाधारण नेपाःमि नागरिकया छु हैसियत चले जुइ? इमिस राजनीतिइ गुकथं हस्तक्षेपकारी भूमिका म्हितेफइ? थ्व सवाल अहं जुयाः पिहाँ वयाच्वंगु दु ।

असार २८ गते सर्वोच्च अदालतं राष्ट्रपतिया नामय् परमादेश जारी यायेधुंकाः असार २९ गते प्रधानमन्त्री जूम्ह शेर बहादुर देउवाया मन्त्रिमण्डल विस्तार जुइमफुगु हुनि धाइगु हे फुक्क सांसदत हे मन्त्री जुइत लालायित जुयाः नेतायात दबाब बियाच्वंगुलिं खः धकाः धकाः ला सुरुइ हे माओवादी नायः पुष्पकमल दाहाल प्रचण्डं न्ववायेधुंकल । मेगु खँ मन्त्री नयेत धकाः हे ओली सरकारया कार्बोहाइड्रेड मन्त्री प्रेम आले व ओलीया जव ल्हाः जुयाच्वंम्ह किसान श्रेष्ठ माधव प्यानलय् वःगु दु । इमिस सीकाः हे देउवाया विश्वासया मत बियाः माधव पक्षय् वःगु खः ।

थुमित मन्त्री बियादिसँ धकाः ला ध्याचूया शैलीं ओलीं नं न्ववाःगु सकसिनं खन । सायद थुपिं थें ज्वःपिं च्याःपिं मनूत मदुगु खःसा ला माधव कुमार नेपालयाके चन्द्रागिरी रिसोर्टय् मनू तयेत औकात हे मदयेगु खःला? माधव नेपालया कोटेश्वरय् च्वंगु थःगु ह छेँ ला बहुदल वयाः बाय् छकू दयेके धकाः दयेकूगु जुयाः आःया राजनीतिक ल्याखं बैठक यायेत हे मल्वःगु व मछिंगु धकाः नं खँ पिहाँ वयेधुंकल । राजनीति गनं गन थ्यने धुंकल । थ्व ल्याखं चप्पल न्ह्यानावःपिंसं गाडी गल धाइगु खँ तकं तसकं पुलां जुइधुंकल ।

बहुदल वयेवं कम्युनिस्टया राजनीतिइ झलनाथ व माधवपिं हे न्ह्यःने खः । तर उबलय् काँग्रेसया गिरिजा थुज्वःपिं नेतात दुबलय् खास तःधंक छुं यायेफुगु खनेमदु । मनमोहनयात प्रधानमन्त्री दयेकाः माधव नेपालं उपप्रधानमन्त्री जुयाः ९ला तक सरकार नं चले यात । वयांलिउ प्रधानमन्त्री छक्वः जुइत उखे यानाः जीला, थुखे यानाः जीला धकाः सनाजुल । दरबारं प्रधानमन्त्री जुइगु लोभ क्यनाः सिलगुढीइ माओवादी नाप लाके छ्वत, दरबारं हे एक्पोज यानाः दरबार हत्याकाण्डया आयोगय् मच्वंगु बदला नं काल । थःपिं थाहाँ वयेत गन गनया च्यानल ज्वनाः अमेरिकी राष्ट्रपति व क्युबाया राष्ट्रपति नाप लाकेगु ज्याय् नं जुल ।

आः गुलि गुलि खराँठपिं नेतात पिहाँ वल, व स्वयेबलय् ला माधव नेपाल नं बौचा हे खनेदत । २०६६ सालया वुटवलया महाधिवेशनय् अध्यक्ष पद वःबलय् माधव नेपाल थः हे अध्यक्ष पदय् दनेमाःम्ह मदंसें केपी शर्मा ओलीयात समर्थन यात धाःसा झलनाथ खनाल दनाः अध्यक्ष जुल । चुनावय् स्वंगूगृु पार्टी जूगु व थः हे चुनावय् बूगु हुनिं झलनाथयात न्ह्यःने तयाः समर्थन यायेमाःगु थासय् माधवं ओलीयात समर्थन याःगु रहस्यमय खः । थुगु महाधिवेशन धुंकाः हे निथासं चुनाव बूम्ह माधव नेपालयात कम्युनिस्टयात काटे यायेत कम्युनिस्ट हे प्रधानमन्त्री धकाः शक्तिकेन्द्रतसें हे प्रधानमन्त्री दयेकूगु जूगुलिं महाधिवेशनया इलय् ओलीयात समर्थन याकूगु नं शक्तिकेन्द्रतय्गु हे ल्हाः खःला धाइगु अनुमान दु । थ्वयांलिउ प्रधानमन्त्री ला जुल तर पार्टी दुनेया पकडय् ओली वल्लानाः २०७१सालया महाधिवेशनय् त्याकल ।

थुकथं पार्टी व सरकारय् थःथःगु व्यक्तिगत पकड हे बल्लाकेगु होड सुरु जूबलय् प्रचण्ड व माधव मिले जुयाः कार्की ब्यांक्वेटं ओलीयात साधारण सदस्य हे मदयेक धकाः पितिना ला छ्वःगु खः । तर फागुन २३ या सर्वोच्च अदालतया फैसलां आनका तान हे हिउपाः हयाबिल । माओवादी ब्यागः जुयाः वन, माधवपिं थःगु हे पार्टी धकाः ब्याक जूबलय् फागुन २८ गते ओलीं थः मनू जक च्वनाः याःगु निर्णयपाखें माधवयात थःगु हे पार्टी नां जकया नेता, ज्याखँय् मामुली कार्यकर्ता दयेकाबिल ।

थ्व सकतां खँ स्वयेबलय् निगूगु पुस्ताया नेतात न थःगु राजनीतिक भविष्य ग्ुकथं सुनिश्चित जुइ धकाःसनाजूगु व उकिया हे हुनिं माधवया साथ मबिउगु खनेदु धाःसा गुलिं तत्काल मन्त्रीया हे लाभ कायेगु धकाः ओली त्वःताः माधवयाथाय् वःपिं नं खनेदु । अथे जुयाः हे माधव नेपालं न्हूगु पार्टी दर्ता यायेधुंकाः व उगु पार्टी मन्त्रिमण्डलय् सामेल जुइगु धकाः धायेधुंकाः नं मन्त्रिमण्डल विस्तार जुइमफयाच्वंगु स्पष्ट खनेदु । माधव नेपालया पक्षय् दुपिं २३ म्ह सांसद, माओवादी केन्द्रया ४९ म्ह सांसद फुक्क हे मन्त्री पदया प्रत्याशी जुयाच्वंगु खनेदु । जसपाया नायः उपेन्द्र यादव हे उपप्रधानमन्त्री पदया प्रत्याशी धकाः धाःसां अन दुने मेपिन्त नं पाः बिइमाःगु सः तच्वयाच्वंगु दु धाःसा काँग्रेसय् दुने नं समस्या तच्वः । थुकथं आः राजनीति धाइगु हे थःपिं थहाँ वयेगु व थःपिं बल्लायेगु खेल जुयाच्वंगु इलय् नेतातय्त मन्त्री ल्ययेत हे धौधौ जुयाच्वंगु दु । मन्त्री नयेमखन धाःसा आयाराम गयाराम जुइगु नं उतिकं खतरा दु । थुकिं यानाः गठबन्धनय् तकं असर लायेफु ।