मुख्यमन्त्री आचार्यं संसद फेस याइगु

येँ – प्रदेश १ या मुख्यमन्त्री भीप्रसाद आचार्यं प्रदेशसभाय् विश्वासया मत काइगु जूगु दु । प्रदेशसभाय् प्रतिनिधित्व यानाच्वंगु एमालेया झिम्ह सांसदत नेकपा एकीकृत समाजवादीइ वनेवं प्रदेशय् वय्कःया सरकार अल्पमतय् लाःगु खःसां वय्कलं राजीनामा मबिसे विश्वासया मत कायेगु तयारी यानादीगु खः ।

वय्कलं थः अल्पमतय् लाःसां नं संवैधानिक प्रावधान कथं न्ह्याःवनेगु धासें थः संविधान कथं मुख्यमन्त्री जुयागु व संविधानय् लछिया दुने विश्वासया मत कायेमाःगु प्रावधान दुगु जुयाः उकियात थम्हं फेस यायेगु खँ धयादीगु दु ।

प्रदेश १ य् एमाले त्वःताः नेकपा एकीकृत समाजवादीइ दुहां वनेधुंकाः सांसद राजेन्द्र राईं मुख्यमन्त्री अल्पमतय् लाःगु धासें राजीनामा फ्वंगु दुसा उकियात लिसः बिसें मुख्यमन्त्री आचार्यं तत्काल राजीनामा मबीगु स्पष्ट यानादीगु खः ।

मुख्यमन्त्री आचार्य संसदय् थःत विश्वासया मत वइगु विश्वास दु धासें धयादिल, ‘जि ज्या याइम्ह मनू खः, अथे जुयाः ज्या याःगु स्वये यःपिं सांसदपिंसं जितः मत बी धइगु विश्वास दु ।’

मुख्यमन्त्री आचार्य थ्व स्वयां न्ह्यः एमालेय् माधव नेपाल पक्षय् दनाच्वंम्ह खःसा पार्टी तज्यायेवं एमालेय् तुं लिहां वंगु खः । वय्कःयात एमाले अध्यक्षया निर्देशन कथं मुख्यमन्त्री दयेकूगु खः । तत्कालीन मुख्यमन्त्री शेरधन राईयात राजीनामा याकाः आचार्ययात मुख्यमन्त्री दयेकूगु खः ।

प्रदेशसभाय् आः एमालेया ४१, नेपाली कांग्रेसया २१, नेकपा माओवादीया १५, नेकपा एकीकृतया १०, जनता समाजवादी पार्टीया ३, संघीय लोकतान्त्रिकया छम्ह व राप्रपाया छम्ह सांसद दु । सरकारयात बहुमतया नितिं ४७ सांसद दुसा गाः । विपक्षी गठबन्धनयाके ४९ म्ह सांसद दु ।