ने. सं. ११४३ तछलाथ्व दशमी -

मुख्यमन्त्री शाक्य अल्पमतय्, आः राजेन्द्र पाण्डेपाखें मुख्यमन्त्री दावी

येँ – निवाः न्ह्यः तिनि बागमति प्रदेशया मुख्यमन्त्री नियुक्त जुयादीम्ह नेकपा (एमाले) या उपाध्यक्ष अष्टलक्ष्मी शाक्य मन्त्रिपरिषद्यात पूर्णता तकं बी मलाकं पदमुक्त जुइ मालीगु अवस्था वःगु दु । बागमति प्रदेशय् एमालेया १२ म्ह सांसदतय्सं म्हिगः नेकपा एकीकृत समाजवादी पार्टीइ दुहां वनेगु निर्णय यायेवं मुख्यमन्त्री शाक्य अल्पमतय् लाःगु खः ।

वय्कः वंगु भदौ २ गते तिनि प्रदेशया मुख्यमन्त्री नियुक्त जुयादीगु खः । नियुक्त जूगु इलय् नेकपा (एमाले) विधिवत् रुपं विभाजित मजूनि । आः विधिवत् रुपं विभाजित जुयाः नं एमालेया १२ म्ह सांसद मेगु पार्टीइ वनेवं मुख्यमन्त्री शाक्य अल्पमतय् लाःगु खः ।

पार्टी विभाजन लिपा प्रदेश सभा व स्थानीय तहया निर्वाचित पदाधिकारीतय्त निगू मध्ये छगू पार्टी ल्ययेगु लागिं निर्वाचन आयोगं भदौ २२ गते तकया ई बिउगु खः । थ्वहे झ्वलय् म्हिगः बागमति प्रदेशया १२ म्ह सांसदतय्सं माधव नेपाल नेतृत्वया न्हूगु पार्टी ल्यःगु खः । प्रदेशया एमाले सांसदपिं राजेन्द्र पाण्डे, राजेन्द्रमान श्रेष्ठ, लक्ष्मण लम्साल, बसुन्धरा हुमागाईं, रमा आले मगर, बसन्त मानन्धर, कुसुम कार्की, पार्वती सिलवाल, इन्द्रमाया गुरुङ, मुनु सिग्देल, माधव पौडेल व कृष्ण खनालपिं एकीकृत समाजवादीइ दुहां वंगु खः । कृष्ण खनाल आः नं शाक्यया मन्त्रिमण्डलय् मन्त्री हे जुयाच्वंम्ह खः ।

बागमति प्रदेशय् एमालेया सभामुख सहित ५६ म्ह सांसद दु । आः १२ म्ह नेकपा ए–स य् प्रवेश यायेवं एमालेयाके ४४ म्ह जक सांसद ल्यं दनि । १०९ सदस्य दुगु बागमति प्रदेशय् सरकार गठन यायेगु लागिं ५५ म्ह सांसद माः ।

थ्व प्रदेशय् नं आः केन्द्रय् थें कांग्रेस, माओवादी व एकीकृत समाजवादीया मंकाः सरकार गठन जुइगु खँ धाःगु दु । तर थनया न्हूम्ह मुख्यमन्त्री आः सु जुइ धइगु खँ धाःसा स्पष्ट मजूनि । मुख्यमन्त्री पदय् एकीकृत समाजवादीया सांसद राजेन्द्र पाण्डें दावी यानादीगु दु । अन विपक्षी गठबन्धन दुने नेपाली कांग्रेसया यक्व मत दु । कांग्रेसया सांसद इन्द्र बानिया नं मुख्यमन्त्रीया लागिं इच्छुक खः ।

शाक्यया मेगु त्याग

येँ देय्या रैथाने एमाले नेता अष्टलक्ष्मी शाक्यं पार्टी एकताया लागिं हानं छक्वः पदया लोभ मयासे तःधंगु त्याग यानादीगु दु । वय्कः यदि थ्व इलय् ओलीया एमाले त्वःताः माधव नेपालया एकीकृत समाजवादी पार्टीइ वंगु जूसा वय्कःया पद अझ नं बचे जुइ तिनि । तर वय्कलं नेकपा विभाजित यानाः मेगु पार्टीइ वनेगु इच्छा याना मदी, बरु पद वंसां वने बिल । थ्व स्वयां न्ह्यः वय्कः ओलीया विरोधी जूगुलिं मुख्यमन्त्री जुइ मखंगु खः । आः ओलीया समर्थक जूगुलिं मुख्यमन्त्री जुइ मखन । अध्यक्ष ओलीं अष्टलक्ष्मी शाक्ययात राष्ट्रपति जुइगु धेंधेंबल्लाःपाखें समेत छखे लाकाः विद्या भण्डारीयात राष्ट्रपति दयेकूगु खः । लिपा मुख्यमन्त्री पदय् नं ओलीं हे छखे लाकाः डोरमणियात हःगु खः ।