मोदीया अभिनन्दनय् भाषाया विवाद

येँ – कन्हसंनिसें नेपाः भ्रमणय् वयेत्यंम्ह भारतीय प्रधानमन्त्री नरेन्द्र मोदीयात जनकपुरय् याइगु नागरिक अभिनन्दनय् हिन्दी भासं समेत अभिनन्दन पौ लःल्हायेगु तयारी जुयाच्वंगु खँयात सत्तारुढ पार्टी एमाले दुने कचवं पिहां वःगु दु ।
जनकपुरय् जुइगु नागरिक अभिनन्दन ज्याझ्वलय् मोदीयात अंग्रेजी, खस नेपाली, मैथिली व हिन्दी भासं च्वयातःगु अभिनन्दनपत्र लःल्हायेगु तयारी जुयाच्वंगु दु ।

उकी मध्ये वय्कःयात मैथिली भासं च्वयातःगु अभिनन्दनपत्र ब्वनाः न्यंकेगु ज्याझ्वः दयेकातःगु दु । मोदीयात हिन्दी भासं अभिनन्दपत्र लःल्हायेत्यंगु ज्याया विरोधय् एमालेया नेता भीम रावलं समेत सार्वजनिक रुपं असन्तुष्टि प्वंकूगु दु । अथे हे पार्टीया सचिव योगेश भट्टराईनं नं हिन्दी खँग्वः मछ्यसे राष्ट्रिय, अन्तर्राष्ट्रिय व मातृभाषा समेत मखुगु भासं अभिनन्दन पौ लःल्हायेगु पाय्छि मखु धकाः असन्तोष प्वंकूगु दु ।

वय्कःपिंसं सामाजिक सञ्जाल व पार्टी दुने समेत थ्व खँ तयेधुंकूगु खँ सीदुगु दु । उखे केन्द्रीय गृह मन्त्रालयं विदेशी पाहांयात अभिनन्दन पौ लःल्हायेबलय् प्यंगू भासं मयासे स्वंगू जक भासं बिउसा गाः धकाः प्रदेश सरकारयात सुझाव बियाछ्वःगु खँ नं सीदुगु दु । थौंकन्हय् जनकपुरय् मोदीया लसकुस यायेत तयातःगु आपालं ब्यानर, पोष्टर व ध्वाखाय् समेत हिन्दी भाय् छ्यलातःगु दु ।

भाषाया थ्व विवादं यानाः आः मोदीयात जनकपुरय् अभिनन्दन यायेगु ज्याझ्वः हे रद्द यानाः केन्द्रीय राजधानी येँय् जक अभिनन्दन याःसां गाः धाइपिं नं पिहां वःगु दु । थ्वहे झ्वलय् मोदीयात येँय् याइगु अभिनन्दन ज्याझ्वःया छुं छुं ब्यानर व पोष्टरय् येँ महानगरपालिकां नेवाः भाय्या नारा व गान नं तयेत्यंगु खँ सीदुगु दु । मोदीयात २८ गते जनकपुरय् व २९ गते येँय् नागरिक अभिनन्दन याइगु ज्याझ्वः दु ।