
एजेन्सी- अफगानिस्तानय् तालिबानयात शान्तिपूर्ण रुपं सत्ता लःल्हायेत्यंगु दु । शान्तिपूर्ण रुपं सत्ता लःल्हायेत गठन याःगु समन्वयात्मक परिषद्या दुजःत तालिबानया नेतात नापलायेत दोहा वंगु दु । इस्लामिक पार्टीया नेता व परिषद्या दुजः गुल्बुद्दिन हेक्मतयारया पुुचः मंगलवाः दोहा वंगु खः । अफगानिस्तानया राष्ट्रपति असरफ घानी देय् त्वःताः बिसिउँ वनेधुंकूगुलिं पूर्व राष्ट्रपति हामिद करजाईया नेतृत्वय् तालिबानत लिसे वार्ता यानाः शान्तिपूर्ण रुपं सत्ता लःल्हायेत्यंगु खः ।
अफगानिस्तान कब्जाय् कायेधुकाः तालिबानतय्सं सरकार गठनया तयारी यानाच्वंगु खः । न्हापा सिबें उदार खनेदुपिं तालिबानया नेतातय्सं नागरिकतय्त दुःख मबिइत, देस त्वःताः पिहां वनेत्यंपिंत मपनेत, लुटपात मयायेत व सार्वजनिक सम्पत्ति संरक्षण यायेत निर्देशन बिउगु दु । अथे हे तालिबानं राष्ट्रसंघया शरणार्थी नियोगयात छगू पौ बियाः राष्ट्रसंघया शरणार्थी नियोगं यानाच्वंगु मानवीय व राहतया ज्या मदिकेत नं धाःगु दु । तालिबानया सांस्कृतिक समितिया दुजः इनामुल्लाह समानगानीं आः गठन जुइगु तालिबान सरकारय् मिस्त नं दइ धाःगु दु । तालिबानं दक्व सरकारी कर्मचारीतय्त आममाफी बिइगु धासें दक्वसितं ज्याय् लिहां वयेत इनाप नं याःगु दु । इनाप लिपा काबुलया मेयर मंगलवाः थःगु ज्याय् लिहां वःगु दु ।
तालिबानतय्सं थीथी भिडियो, ट्विट व वक्तव्य पिकयाः अफगानिस्तानया नागरिकतय्त थःपिंत विश्वास यायेत इनाप यानाच्वंसां आमनागरिकत धाःसा तालिबान खनाः ग्यानाच्वंगु हे दनि । काबुलया विमानस्थलय् सोमवाः तालिबानतलिसे ग्यानाः देय् त्वःताः बिसिउँ वनत्यंपिनि तःधंगु भिड जूगु खः । विमानस्थलयात अमेरिकी सेनां कब्जाय् काःगु खःसा हवाइफायर तक नं याःगु खः । हवाइफायर लिपा जूगु भागदौडय् न्याम्ह मनू सीगु खः । सावर्जनिक जूगु छगू भिडियोय् मनूत ब्वयाच्वंगु हवाइजहाजं कुतुं वयाः सीगु खनेदुगु खः । विमानस्थल आः चालेधुंकूगु दु ।
अफगानिस्तानया सरकारी सेना नं देस त्वःताः बिसिउँ वनाच्वंगु दु । समाचार संस्था रोयटर्सया कथं न्हय्सः सिबें अप्वः अफगानी सैनिक उज्वेकिस्तान बिसिउँ वंगु दु । समाचारकथं २२ गः सैनिक विमान व २४ गः हेलिकप्टरय् च्वनाः सैनिकत बिसिउँ वंगु खः । मेखे अफगानिस्तानय् नेटोयात ग्वाहालि याःपिं अफगानी नागरिकत तालिबानतय्सं आः थःपिंत छु याइगु खः धकाः ग्यानाच्वंगु दु ।
विश्वया दक्व धयाथे देसं तालिबानतय्गु विरोध यानाच्वंगु दुसां चीन, पाकिस्तान व रुसं धाःसा समर्थन क्यनेधुंकूगु दु । थीथी देसं अफगानी नागरिकतय्त शरण बिइगु नं धयाच्वंगु दु ।
LEAVE YOUR COMMENTS