स्वला न्ह्यःनिसें बेवारिस छगः स्कुटर

येँ -जमाना थौंकन्हय् थुलि खराब कि लँय् गनं बाइक दिका थकल धाःसा मिखा फुति याये लाइमखुनि खुया यंका तयेधुंकी । तर येँया २४ वडास्थित मखं त्वालय् धाःसा वंगु स्वला न्ह्यवंनिसें सुं मनुखं त्वःता थकूगु स्कुटर छगः सुनां हे काः मवयाः स्थानीय मनूत हैरान जुल ।

स्वला न्ह्यः जनबहाःद्यः साःगु इलंनिसें बा. ६५ प ३७३४ नम्बरया उगु स्कुटर मखनय् सुरज आर्केडया न्ह्यःने अथें लानाच्वंगु खः । न सुनां जिगु धकाः काः वल, न सुनां खुया हे यंकल ।

निला ति न्ह्यः वडा सदस्य विनोद तुलाधरं थःगु फेसबुक मार्फत उगु स्कुटर सुयागुं खःसा कया यंकि धकाः फोटो नापं तयाः प्रचार यानादीगु खः, तर सुनां हे काः मवः । चछि न्हिछिं हे स्कुटर अन लानाच्वंसां सुनां हे दावी याः मवःगु खनाः स्थानीय मनूत अजू चाल ।

थ्वहे झ्वलय् म्हिगः वडा कार्यालयं जनसेवा प्रहरीयात सःताः उगु स्कुटर प्रहरी चौकीइ तयेके छ्वया बिल । आः प्रहरीं हे थुवाः मालाः स्कुटर लःल्हायेगु ज्या याइगु खँ वडा सदस्य तुलाधरं ‘नेपालभाषा टाइम्स’ यात कनादिल ।