पल्पसायात वया हे छेँजःपिंसं जँलास्येँ बीगु

येँ- जँलास्येँया ल्वचं कयाच्वंम्ह नांजाःम्ह कलाकार पल्पसा डंगोलयात वय्कःया छेँजःपिंसं जँलास्येँ बीगु जूगु दु । निगलं जँलास्येँय् समस्या जुयाः थौंकन्हय् थनया त्रिवि शिक्षण अस्पतालय् वासः याकाच्वनादीम्ह कलाकार डंगोलयात वय्कःया छेँजःपिंसं जँलास्येँ बीत तयार जूगु खँ सीदुगु दु ।

झण्डै निला न्ह्यवंनिसें म्हं मफयाच्वंगु कलाकार डंगोलया निगलं जँलास्येँ ज्या मयाःगु चिकित्सकतय्सं धाःगु दु । शिक्षण अस्पतालया बेड नं ३०५ य् वासः याका च्वनादीम्ह वय्कःयात जँलास्येँ बीत न्याम्ह छेँजःपिं तयार जुइधुंकूगु खँ सीदुगु दु ।

पल्पसां थनिं न्यादँ न्ह्यः हे थःत जूगु समस्याया बारे जानकार जूसां सुयातं मधासे उकियात सुचुकातःगु खः । वय्कलं थःत जूगु समस्या बारे थःथिति, पासाभाई जक मखसे थः छेँजःपिं मांअबु, म्ह्याय्पिंत तकं मधासे च्वनाच्वंगु खः । शुटिंगय् नं पल्पसां थम्हं नयेगु बारे याना तयागु धासें चिल्लो, पाउँ, पालु मसला दुगु नसाज्वलं मनसे मनातःगु ज्वलं जक नयेगु याना वयाच्वंगु खः।

खय् भाय्या हास्य टेलिप्याखं ‘मेरी बास्सै’लय् अभिनय यानाः ‘चम्सुरी’ नामं स्वकुमिया नुगलय् थाय् कायेत ताःलाःम्ह पल्पसां आपालं नेवाः भाय्या संकिपाय् नं अभिनय यानादीगु दु ।

करिब निला न्ह्यः जँलास्येँय् समस्या जुइवं अस्पताल भर्ना जुयादीगु खःसा छुं भचा सुधार जुइवं वय्कः डिस्चार्ज जुयादीगु खः । हाकनं समस्या जुइवं अस्पताल भर्ना जुयादीम्ह वय्कःया नियमित रुपं डायलोसिस जुयाच्वंगु व आः स्वास्थ्यय् नं सुधार जुया वयाच्वंगु दु ।

जँलास्येँ बीपिं तयार जुइवं प्रत्यारोपणया निंतिं स्वम्हेसिया स्वास्थ्य परीक्षण तकं जुइधुंंकूगु सीदुगु दु ।

सम्बन्धित बुखँ

LEAVE YOUR COMMENTS