ने. सं. ११४४ ञलाथ्व नवमी -

कोरोनां अर्थतन्त्र ध्वस्त

येँ – कोरोना भाइरसया कारणं विश्व अर्थतन्त्रय् बांमलाःगु लिच्वः लायेफइगु संकेत खने दयावःगु दु । चीनं शुरु जूगु कोरोना भाइरसया संक्रमण विश्वया १०१ गू देशय् थ्यनेधुंकूगु दु । गुकिया लिच्वः पर्यटन बजारय् लाःगु दु ।

विश्वया निगूगु तःधंगु अर्थतन्त्र दुगु देय् चीनं आपालं पर्यटक विश्वया थीथी देशय् वनेगु यानाच्वंगु दु । विश्व बजारय् चिनियाँ पर्यटकया महत्वपूर्ण योगदान दु । चिनियाँ पर्यटक म्हो जुइवं विश्व पर्यटन बजारय् लिच्वः लायेफइगु विश्लेषण जुयाच्वंगु खःसा आः नेपाः लगायत आपालं देशय्चि नियाँ पर्यटक म्हो जुयाः पर्यटन बजारय् रोजगारी मदयेका च्वनेमाःगु अवस्था ब्वलने फुगु सम्भावना अप्वया वनाच्वंगु खँ अर्थविद्तय्सं धयाहःगु दु ।

कोरोनाया कारणं तःधंगु बहुराष्ट्रिय कम्पनीं थःगु उत्पादन व आम्दानी म्हो जुइगु अनुमान सार्वजनिक यायेधुंकूगु दु । थ्वहे झ्वलय् नेपाःया होटल व्यवसायीतय्सं नं थःपिनि कर्मचारी कटौती यायेगु योजना हयेधुंकूगु दु । गुकिया लिच्वः नेपाःया श्रम बजारय् लायेफइगु सम्भावना अप्वया वनाच्वंगु दु ।

लिसें नेपाःया आपालं बेरोजगार ल्याय्म्हपिं वैदेशिक रोजगारया निंतिं वनेगु यानाच्वंगु खःसां नं कोरोना भाइरसया संक्रमण लिपा ७५ प्रतिशत वैदेशिक रोजगारी वनीपिं नं म्हो जुइधुंकूगु खँ सरकारी तथ्यांकं क्यनाच्वंगु दु । थुकिया लिच्वः नं बांमलाइगु खनेदु ।

चि-चिनी माक्व हे दु

साल्ट ट्रेडिङ कर्पोरेशन लिमिटेडं झिलाया निंतिं देय्या माग फये फइ कथं चिया लिसें अत्यावश्यकीय वस्तुया भण्डारय् दुगु खँ धाःगु दु । म्हिगः छगू प्रेस विज्ञप्ति जारी यासें साल्ट ट्रेडिबं उगु खँ धाःगु दु ।

साल्ट ट्रेडिङं कोरोना भाइरसया त्रास लिसें उपभोग्य वस्तुया अभाव जुइफइगु चिन्ता अप्वया वनाच्वंगु इलय् विज्ञप्ति जारी यासें सर्वसाधारण जनतायात निश्चिन्त जुया च्वनेत इनाप याःगु खः । प्रेस विज्ञप्तिइ बजारय् चि, चिनीलिसे न्हिथं माःगु उपभोग्य वस्तुया कृत्रिम अभाव ब्वलंकाः हाकु बन्जाः जुयाच्वंगु खँय् ध्यानाकर्षण जूगु धासें कर्पोरेशनया प्रमुख कार्यकारी उर्मिला श्रेष्ठं थःपिंके माक्व स्टक दुगु खँ धयादीगु खः ।

वय्कःया कथं कर्पोरेशनयाके १५८ ५०० मेट्रिक टन चि मौज्दात दु । उगु मौज्दात झिलाया निंतिं पर्याप्त जू धासें थौंकन्हय् चिया अभाव मजूगु जानकारी बियादीगु दु ।

नेपाःया बजारय् लछिया दुने १६ हजार मेट्रिक टन चि खपत जुयाच्वंगु जानकारी बियादिसें चि आयातय् गुगुं नं कथंया समस्या मदुगुलिं जनतायात ढुक्क जुयाः च्वनेत इनाप नं यानादीगु दु ।

उकथं हे साल्ट ट्रेडिङयाके थौंकन्हय् २५०० मेट्रिक टन चिनी गोदामय् दुगु व ७५०० मेट्रिक टन चिनी आयातया झ्वलय् दु धासें उगु चिनी म्होतिं नं न्याला स्वयां अप्वःयात गाःगु खँ धाःगु दु ।

चि व चिनीया हाहाकार दु वा जुइ धकाः जनता चिन्तित जुइमाःगु अवस्था मदुगु धासें भण्डारण मयायेत नं साल्ट ट्रेडिङं इनाप याःगु दु । साल्ट टे«डिबं चि, चिनी, एलपी ग्यास, जाकि, चिकं, छुचुं, मैदा व केँ लगायत उपभोग्य वस्तु मीगु यानाच्वंगु दु ।