अर्जेन्टिनायात कोपा अमेरिका कप, मेसी उत्कृष्ट कासामि

येँ – डिफेन्डिङ्ग च्याम्पियन ब्राजिलयात बुकाः अर्जेन्टिनां कोपा अमेरिका कप त्याकूगु दु । आइतवाः सुथय् जूगु कासाय् डि मारियाया छगू जक गोलया ग्वाहालिं अर्जेन्टिनां कोपा त्याकूगु खः । अर्जेन्टिनाया निंतिं २८ दँ लिपा थ्व दकलय् न्हापांगु महत्वपूर्ण अतर्राष्ट्रिय उपाधी खः । सन् १९९३ य् कोपा त्याकेधुंकाः अर्जेन्टिनां छुं नं महत्वपूर्ण अन्तर्राष्ट्रिय उपाधी त्याकूगु मदुनि ।

अर्जेन्टिनाया कप्तान लियोनल मेसीया निंतिं नं थ्व महत्वपूर्ण उपाधी खः । खुक्वः तकया बेलन डी’ओर त्याकेधुंकूम्ह मेसीं क्लब फुटबलय् नं यक्व हे उपाधी त्याकूगु दु, तर थःगु देय् अर्जेन्टिनाया निंतिं छुं नं उपाधी त्याके मफुगुलिं आलोचित जुयाच्वंगु खः । मेसी धेंधेंबल्लाःया उत्कृष्ट कासामि व दकलय् अप्वः गोल याःम्ह कासामि नं जूगु दु ।

आइतवाः सुथय् ब्राजिलयात घरेलु मैदानय् बुकेगु निंतिं कासाया २२ औं मिनेटय् डि मारियां छगू जक गोल याःगु खः । मारियां डि पाउलोया पासय् थ्व गोल याःगु खः । कासाया ५२ औं मिनेटय् ब्राजिलया रिचार्डसनं गोल याःगु खःसां अफसाइडया कारणं गोल मबिउगु खः ।
अर्जेन्टिनाया इमिलेनो मार्टिनेजयात थुगुसीया धेंधेंबल्लाःया उत्कृष्ट गोलकिपर जूगु दु । सेमिफाइनलय् कोलिम्बिया नाप जूगु कासाय् मार्टिनजं स्वंगू पेनाल्टि पंगु कारणं अर्जेन्टिनां फाइनल तकया यात्रा यायेफुगु खः ।