३ नम्बर प्रदेशया मुख्यमन्त्री दौड शुरु जुल

येँ – ३ नम्बर प्रदेशया मुख्यमन्त्री जुइगु लागिं एमाले दुने तीव्र दौड शुरु जूगु दु । म्हिगः थुकिया बारे जूगु छगू आन्तरिक बैठकय् येँपाखें त्याःम्ह सांसद केशव स्थापितं नं मुख्यमन्त्री पदय् थःगु सशक्त दावी पेश यानादीगु खँ सीदुगु दु । वय्कःया नापनापं मेम्ह सांसद सानु श्रेष्ठं नं मुख्यमन्त्रीया दावी यानादीगु खः ।

मुख्यमन्त्रीया रुपय् मकवानपुरया सांसद डोरमणि पौडेलं नं दावी यानाच्वंगु दुसां वय्कःयात सभामुख दयेकाः मुख्यमन्त्री केशव वा सानु जुइगु खँ वयाच्वंगु दु । मेम्ह सशक्त दावेदार अष्टलक्ष्मी शाक्यया पक्षय् धाःसा आः वयाः कम जक सांसदत वःगुलिं ३ नम्बरया मुख्यमन्त्री सु जुइ धइगु खँ आः वयाः अस्पष्ट जूगु खँ धयाहःगु दु ।