रसियायात ४–१ गोलं बुकाः डेनमार्क निगूगु चरणय्, बेल्जियम नं त्यात

येँ – युरो कप २०२० या समूह चरणया अन्तिम कासा त्याकुसें डेनमार्क निगूगु चरणय् दुहां वनेत ताःलाःगु दु । न्हापांगु निगू कासा मानसिक दबाबय् म्हिताः पराजय फयेमाःगु डेनमार्क रसिया विरुद्ध फर्म लिहां वसें ४–१ गोलं कासा त्याकूगु खः ।

फिनल्यान्ड लिसेया न्हापांगु कासाय् थः मू कासामि क्रिस्टिन एरिक्सन बेहास जुयाः मैदानय् क्वःदयेवं डेनमार्क मानसिक दबाबय् कासा म्हिताच्वंगु खः । तर अस्पतालं डिस्चार्ज जुइधुंकाः एरिक्सनं सोमवाः डेनमार्कया कासामिपिंत ट्«ेनिङय् आकाझाकां नापलाःवःगु खः । शायद थुकिया हे प्रभाव जुइमाः डेनमार्कं रसियायात ४–१या तःधंगु अन्तरं पराजित यायेत ताःलाःगु दु ।

सोमवाः चान्हय् जूगु मेगु कासाय् बेल्जियमं फिनल्यान्डयात २–० गोलं बुकूगुलिं नं डेनमार्क निगूगु चरणय् दुहां वनेत सफल जूगु खः । समूह बी पाखे थ्व कासा लिपा बेल्जियम, रसिया, फिनल्यान्ड स्वंगुलिं टिमयाके ३–३ अंक जूगु खः, तर रुसयात ४ गोलं बुकेवं डेनमार्क गोल अन्तरया ल्याखं तप्यंक निगूगु चरणय् दुहां वनेत ताःलाःगु खः । बेल्जियम धाःसा थ्व समूहय् स्वंगुलिं कासा त्याकाः शीर्षस्थानय् दु ।

डेनमार्कया निंतिं कासाया ३८ औं मिनेटय् डाम्स्गार्डं अग्रता बिउगु खःसा थ्व लिपा पोउल्सन, क्रिष्टिनेसेन व माह्लें छगू छगू गोल याःगु खः । रसियाया निंतिं डिजुवां छगू जक गोल याःगु खः ।

बेल्जियमया विजयया झ्वलय् छगू आत्मघाती गोल नं ल्हातय् लात । फिनलयान्डया राडिकिं कासाया ७४ औं मिनेटय् आत्मघाती गोल यायेवं बेल्जियमं अग्रता काःगु खःसा थ्वयां ७ मिनेट लिपा रोमेलु लुकाकुं थप छगू गोल याःगु खः ।