युरोकपया फाइनल व सेमिफाइनल स्वःवयेत ६०द्वः दर्शकयात प्रवेश अनुमति

एजेन्सी- बेलायतं युरोकप २०२० या फाइनल व सेमिफाइनल कासा रंगशालाय् वयाः स्वयेत ६० द्वः दर्शकतय्त प्रवेशया अनुमति बिइगु जूगु दु । बेलायत सरकारं लण्डनया वेम्बली स्टेडियमय् जुइगु फाइनल व सेमिफाइनलया दर्शकतय्त प्रवेश अनुमति बिइगु निर्णय याःगु खः । थ्व ल्याः वेम्बली स्टेडियमया क्षमताया ७५ प्रतिशत खः ।

युईएफएया अध्यक्ष अलेक्जेन्डर कफेरिनं थ्व बांलाःगु ज्या जूगु धाःगु दु । अध्यक्ष कफेरिनं यक्व समर्थकतय्सं अन्तिम स्वंगू कासा वेम्बली स्टेडियमय् स्वयेखनीगु नं धाःगु दु । कासा स्वःवनीपिं दर्शकतय्गु कोरोनाया रिपोर्ट नेगेटिभ जुइमाः । अथे मखुसा कोरोना खोपया निगुलिं डोज कायेधुंकूगु जुइमाः । अथेहे स्टेडियम वइपिंसं कोरोना सम्बन्धी दक्व नियमया पालना यायेमाःगु युईएफइएं धाःगु दु ।

युरोकपया समुह “डि”इ च्वंगु इंग्ल्याण्ड, क्रोएसिया व चेक गणतन्त्र युरोकपया नकआउट चरणय् थ्यंगु दु । मंगलवाः चान्हय् जूगु कासाय् इंग्ल्याण्डं चेक गणतन्त्रयात बुकाः नकआउट चरणय् थ्यंगु खःसा क्रोएसियां स्कटल्याण्डयात बुकाः नकआउट चरणय् थ्यंगु खः । चेक गणतन्त्रं युरो कपया नियमकथं उत्कृष्ट स्वंगुली लानाः नकआउट चरणय् थाय् दयेकूगु खः । थ्व समुहं स्कटल्याण्ड धेंधेंबल्लाखं पिने लाःवंगु दु ।

इंग्ल्याण्डं चेकयात १–० गोलं बुकूगु खः । इंग्ल्याण्डया निंतिं कासाया छगू जक गोल रहिम स्ट्रर्लिङं १२ औं मिनेटय् ज्याक ग्रेलिसया पासय् याःगु खः । इंग्ल्याण्डं समुह चरणय् निगू कासा त्याकूगु खःसा छगू बराबरी म्हितूगु खः । इंग्ल्याण्डं न्हापांगु कासाय् क्रोएसियायात बुकूगु खःसा स्कटल्याण्डलिसे बराबरी म्हितूगु खः । इंग्ल्याण्डलिसे अन्तिम कासाय् बूगु चेक गणतन्त्र उत्कृष्ट स्वंगुलिइ लानाः नकआउटय् थ्यन । चेकं स्कटल्याण्डयात बुकूगु खःसा क्रोएसियालिसे बराबरी म्हितूगु खः ।

मंगलवाः चान्हय् जूगु मेगु कासाय् क्रोएसियां स्कटल्याण्डयात ३–१ गोलं बुकल । क्रोएसियाया निंतिं कासाया १६ औं मिनेटय् भ्लासिक, ६२ औ मिनेटय् कप्तान लुका मोडरिक व ७७ औ मिनेटय् इभान पेरिसिकं गोल याःगु खः । स्कटल्याण्डया निंतिं ४२ औं मिनेटय् म्याक ग्रेगोर टिमया निंतिं छगू गोल याःगु खः ।