सशस्त्रया डीआईजी श्रेष्ठया सेवा अवधि थप, दछि लिपा आईजीपी

येँ- नेपाल सरकारं सशस्त्र प्रहरी नायब महानिरीक्षक (डीआईजी) प्रविणकुमार श्रेष्ठया सेवा अवधि दछि थप याःगु दु । सशस्त्रया डीआईजी श्रेष्ठया सेवा अवधि थप जूगुयालिसें आः वय्कःयात महानिरीक्षक जुइगु लँपु नं चाःगु दु ।

वंगु सोमवाः च्वंगु मन्त्रिपरिषद्या बैठकं डीआईजी श्रेष्ठया सेवा अवधि दछि थप यायेगु निर्णय याःगु खः । थौंकन्हय् सुदूरपश्चिम सशस्त्र प्रहरी प्रमुख जुयाच्वनादीम्ह श्रेष्ठया सेवा अवधि थप यायेगु निर्णय लिपा आः वइगु बैशाखय् वय्कः सशस्त्र प्रहरीया प्रमुख जुयादीगु जूगु दु ।

सशस्त्र प्रहरी नियमावली २०७२या खण्ड ६४ या नियम २ या उपनियम १ य् अतिरिक्त प्रहरी महानिरीक्षक (एआईजी) व प्रहरी नायब महानिरीक्षक (डीआईजी)या सेवा अवधि दछि थप याये फइगु व्यवस्था यानातःगु दु ।

डीआइजी श्रेष्ठया सेवा अवधि सशस्त्रया व हे नियमावलीकथं थप याःगु खः । सेवा अवधि थप लिपा वइगु बैशाखय् वय्कः सशस्त्रया महानिरीक्षक जुयादीगु जूगु दुसा वय्कःया कार्यकाल २०८२ कात्तिक २६ गतेतक जुइ ।

सम्बन्धित बुखँ

LEAVE YOUR COMMENTS