शितला माविइ सामाजिक परीक्षण सुनुवाइ ज्याझ्वः
येँ (नेपालभाषा टाइम्स)÷ येँ महानगरपालिका १६ वडा बालाजुइ च्वंगु शितला माध्यमिक विद्यालयय् सामाजिक परीक्षण सुनुवाइ ज्याझ्वः जुल । विद्यालयया संस्थापक, पुलांम्ह प्रधानाध्यापक शुक्रलाल श्रेष्ठया अध्यक्षताय् जूगु उगु ज्याझ्वलय् येँमपा १६ वडाया वडा सदस्य शारदा सुवेदी, तरुण स्रोत केन्द्रया स्रोत शिक्षक नारायण प्रसाद नेपाल, समाजसेवी श्याम श्रेष्ठ, प्रकाश बलामी, उद्धव थापा, शिक्षक अभिभावक संघया अध्यक्ष केशव खड्कालगायत थीथी संघसंस्थाया प्रतिनिधि, शिक्षक, अभिभावक, विद्यार्थी लगायतया ब्वति दुगु खः।
विद्यालयया लेखासहायक कमल पौडेलं आर्थिक आयव्यय विवरण, सहायक प्र.अ. ईश्वरी अधिकारीं शैक्षिक विवरण न्ह्यब्वयादीगु उगु ज्याझ्वलय् विद्यालयया प्रशासनिक तथा भौतिक अवस्थाया बारे न्ववासें प्रधानाध्यापक लक्ष्मण श्रेष्ठं वइगु दिनय् विद्यालयं आर्थिक पारदर्शिता व सयेका कायेगु गुणस्तर विकासय् अझ अप्वः न्ह्यचिलेगु खँय् प्रतिबद्धता प्वंकादिल । वय्कलं शिक्षाया गुणस्तर वृद्धि यायेत शिक्षक, विद्यार्थी, अभिभावक नापं संघ संस्थाया तःधंगु भूमिका जुइगु खँय् बः बियादिल ।
स्रोतकेन्द्रया स्रोत शिक्षक नारायण प्रसाद नेपालं विद्यालयया आर्थिक पारदर्शिता व कुशल व्यवस्थापनया प्रशंसा यासे शैक्षिक गुणस्तर सुधारय् विद्यालय प्रशासन व शिक्षकत न्ह्याबलें सतर्क जुइमाःगु बिचाः तयादिल । ज्याझ्वलय् प्रकाश बलामी, श्याम श्रेष्ठ, केशब खड्का, प्रतिभा रिजाल लगायतं शैक्षिक सुधार नापं अतिरिक्त क्रियाकलापय् थःपिंसं ग्वाहालि यानाः न्हयाः वनेगु प्रतिवद्धता व्यक्त यानादीगु खः ।
विद्यालयं थःपिनिगु विद्यालयय् खेलकुद, तालिम, स्वास्थ्य सुविधा व प्राथमिक उपचार, नापं मेमेगु शैक्षिक गतिविधि नापनापं न्ह्याका यंकेगु प्रतिवद्धता नं प्वंकादिल ।
LEAVE YOUR COMMENTS